«ەكى اتامدى دا اتىپ, بەلگىسىز جەرگە كومدى»: پرەزيدەنتتىڭ ءباسپاسوز حاتشىسى وتباسىندا بولعان قيىندىقتى ايتتى

قاسىم—جومارت توقاەۆتىڭ ءباسپاسوز حاتشىسى رۋسلان جەلدىباي اۋلەتىنىڭ باسىنان وتكەن قيىندىقتى ايتتى. تىپتەن ول ەرتەرەكتە تەگىن دە وزگەرتكىسى كەلگەن, دەپ حابارلايدى qandastar.kz

ايتۋىنشا ءوزىنىڭ اتا-بابالارى ساياسي قۋعىن—سۇرگىننىڭ قۇربانى بولعان.

«مەكتەپتە وقىپ جۇرگەندە تەگىمدى وزگەرتكىم كەلەتىن. اتامنىڭ ەسىمى ەگەمبەردى, ءبىزدىڭ اۋلەتتە كوپشىلىگىمىزدىڭ تەگى سولاي. ال مەنىكى ارعى اتامنىڭ تەگى. سول سەبەپتى تەگىمدى ەگەمبەردى دەپ جازدىرعىم كەلگەن ەدى.

بىراق ءبىر اڭگىمە ءبارىن وزگەرتتى. اكەم ارعى اتامنىڭ تاعدىرىن ايتىپ بەرگەن. ول كىسى داۋلەتتى, ەلگە سىيلى بولعان ەكەن. 1930 جىلدارى سوۆەتتىك بيلىكتىڭ ساياسي قۋعىن-سۇرگىنىنە ۇشىراعان. قايدا جەرلەنگەنىن دە ناقتى بىلمەيمىز, تەك شامامەن عانا بولجايمىز. اجەمىزدەن دە حابار جوق.

اتام سول كىسىنىڭ جالعىز ۇلى, تاعدىردىڭ تالكەگىمەن جەتىم قالعان. ناعاشى اتام دا سول قۋعىن-سۇرگىننىڭ قۇربانى», — دەپ جازدى ول.

ايتۋىنشا, جاقىندارى ستاليندىك قۋعىن, جازالاۋ كەزىندە ءبىر بىرلەرىنەن اجىراپ قالعان. ال اتالارى سول قالپى ورالماعان.

«اپام تۋعان سىڭىلىسىنەن كوز جازىپ قالىپ, ەكەۋى ارادا 40 جىل وتكەن سوڭ, 1972 جىلى عانا ءبىرىن-ءبىرى قايتا تاپقان. ەكى اتامدى دا اتىلعاندارمەن, تۇرمەدە كوز جۇمعاندارمەن بىرگە بەلگىسىز جەرگە كومە سالعان دەگەن حابارىمىز بار.

بۇل مەنىڭ عانا ەمەس, مىڭداعان قازاق وتباسىنىڭ تاعدىرى», — دەدى رۋسلان جەلدىباي.

Skifnews.kz جازعانداي,   قازاقتى زيالىلارى تۇگەلگە جۋىق اتىلىپ, جازىقسىز جاندار قۋدالاۋعا ۇشىراعان قۇربانداردى ەسكە الۋ كۇنى.

«ءبىز جازىقسىز قۋعىن-سۇرگىنگە ۇشىراعان مەملەكەت جانە قوعام قايراتكەرلەرىنىڭ, عالىمدار مەن دارىگەرلەردىڭ, سونداي-اق, ولاردىڭ تۋىستارى مەن جۇبايلارىنىڭ ەسىمىن ۇمىتپاۋىمىز كەرەك. بىراق قانداي اۋىر بولسا دا, وتكەن كۇندەردىڭ قاسىرەتى ەلىمىزدىڭ دامۋىنا, ءوسىپ-وركەندەۋىنە كەدەرگى بولماۋعا ءتيىس.

قازاق حالقى تاۋەلسىز جانە ەگەمەن ەل بولۋ جولىندا سان ءتۇرلى قيىندىقتى ارتقا تاستاپ, كوپتەگەن سىن-قاتەردى ەڭسەردى. سوندىقتان, تاۋەلسىزدىك – بارىنەن قىمبات قاستەرلى ۇعىم ەكەنىن ساناعا ءسىڭىرۋىمىز قاجەت.

جالپىۇلتتىق بىرلىگىمىزدى كوزدىڭ قاراشىعىنداي ساقتاپ, مەملەكەتتىگىمىزدى نىعايتۋ ماڭىزدى. تاعى دا قايتالاپ ايتامىن: وتكەندى ۇمىتپاي, ءتول تاريحىمىزعا قۇرمەتپەن قاراۋ – دۇرىس, دەمەك, ءبىز تەك العا قاراي ءجۇرىپ, جارقىن بولاشاققا ۇمتىلۋىمىز كەرەك», — دەگەن ەدى پرەزيدەنت توقاەۆ.

ءبىز بۇنى ۇمىتپاۋىمىز كەرەك. ەستە ساقتاۋ پارىز.

«بىراق وكىنىش پەن ىزاعا بوي الدىرماي, بولاشاققا قاراپ, مەملەكەتىمىزدى دامىتۋ امانات.

سەبەبى ءبىز سولار ارمانداعان, بىراق جەتە الماعان تاۋەلسىزدىكتىڭ ۇرپاعىمىز. ەندەشە, ونىڭ قادىرىن ءبىلۋ ءبىزدىڭ مىندەتىمىز»,  — دەپ جازدى پرەزيدەنتتىڭ ءباسپاسوز حاتشىسى.