Eki qyzyn tunshyqtyryp óltirgen: 21 jastaǵy qazaqstandyqqa sot úkimi shyqty

Jantúrshigerlik oqıǵa bıyl sáýirde boldy. Sot málimetinshe, aıyptalýshy úsh jas qyzymen birge Qaraǵandy oblysynyń Buqar Jyraý aýdanyndaǵy aýyldardyń birinde birge turǵan. Bir kúni er adam úıde balalarymen birge turatyn áıeldi jaýyp, jumysqa ketedi.

Aıyptaý aktisine sáıkes, jas áıel aqshanyń, azyq-túliktiń jetispeýshiliginen jáne balalardyń únemi jylaýynan kúızeliske ushyraǵan. Al onyń úıde qamaýda otyrýy jaǵdaıdy odan ári nasharlatty. Balalardyń kezekti ret jylaǵannan keıin ol úlken qyzyna tósekke jatýdy buıyryp, olardy kórpemen jaýyp, tunshyqtyrǵan.

Sottalýshy kináni ishinara ǵana moıyndady. Ol balalardy óltirýge nıeti bolmaǵanyn, olardy azdap tynyshtandyrǵysy kelgenin málimdedi. Sottalýshynyń advokaty aıyptaýdy 99-baptyń 3-bóliginen «kámeletke tolmaǵan adamdardy óltirý» QR Qylmystyq kodeksiniń 104-babynyń 2-bóligine «eki adamǵa abaısyzda ólim keltirý» qaıta saralaýdy surady.

Qaraǵandy oblysynyń soty is boıynsha jınalǵan barlyq materıal men dáleldemelerdi zerdelegennen keıin sottalýshyny kámeletke tolmaǵan balalardy óltirgeni úshin kináli dep tanyp, 20 jylǵa bas bostandyǵynan aıyrý jazasyn taǵaıyndady. Ol jazasyn ortasha qaýipsizdik qylmystyq-túzeý júıesi mekemesinde óteıdi.

«Is boıynsha kiná men jazany jeńildetetin jáne aýyrlatatyn mán-jaılar anyqtalǵan joq. Sottalýshyǵa júktelgen baptyń sankııasy 20 jyl merzimge bas bostandyǵynan aıyrý nemese ómir boıyna bas bostandyǵynan aıyrý túrindegi jazany kózdeıdi. Jaza taǵaıyndaý kezinde Qylmystyq kodekstiń 46-babynyń 4-bóliginiń talaptary eskerildi, oǵan sáıkes áıelderge ómir boıyna bas bostandyǵynan aıyrý taǵaıyndalmaıdy. Úkim zańdy kúshine engen joq», – dep habarlady Qaraǵandy oblysynyń SMÝS baspasóz qyzmeti.

Aıta keteıik, sottalýshynyń úsh qyzy bolǵan, kenjesi qylmys jasalǵan kezde nebári alty aılyq bolǵan. Anasy ustalǵannan keıin náreste Náresterler úıine jiberildi.