“ەكى جىل قورقىتقان”: بقو جانە قوستاناي وبلىسىندا بۋللينگ جاساعان بالالاردىڭ اتا-اناسى جازالاندى

فوتو: اشىق دەرەككوز

باتىس قازاقستان جانە قوستاناي وبلىستارىندا اۋلادا جانە مەكتەپتە بۇزاقىلىق جاساعان ەكى ءجاسوسپىرىمنىڭ اتا-اناسىنا قاتىستى سۋديالار شەشىم شىعاردى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

ورال قالاسىنىڭ اكىمشىلىك قۇقىق بۇزۋشىلىق ىستەر جونىندەگى مامانداندىرىلعان سوتىندا 10 جاسار گ-نى قورقىتىپ, اقشاسىن تارتىپ العان 13 جاسار ر-دىڭ اناسىنا قاتىستى اكىمشىلىك ءىس قارالدى.

بقو سوتىنىڭ ءباسپاسوز قىزمەتىنەن ءمالىم ەتكەنىندەي, ر-دىڭ اناسى سوتتا بالاسىنىڭ گ-نى ۇرىپ-سوققانىن, ۇلىمەن سويلەسكەنىن جانە قورلاۋدى جوققا شىعارعانىن راستادى.

گ-نىڭ اناسىنىڭ ايتۋىنشا, ۇلىن قورقىتۋ ارەكەتى 2 جىلعا جۋىق ۋاقىتقا سوزىلعان, بالاسى قورقىپ قالعان, ۇزاق ۋاقىت بويى ءوزىن قورقىتقان بالانىڭ اتىن ايتپاعان. ول تاتۋلاسۋدان ءۇزىلدى-كەسىلدى باس تارتتى.

ر-دىڭ قورلاۋ فاكتىسى سوت زالىندا اكىمشىلىك قۇقىق بۇزۋشىلىق تۋرالى حاتتامادا بەلگىلەنگەن ءمان-جايلارمەن, جابىرلەنۋشىنىڭ ارىزىمەن, كۋالار مەن كۋاگەرلەردىڭ جازباشا تۇسىنىكتەمەلەرىمەن جانە ءىستىڭ باسقا ماتەريالدارىمەن راستالدى.

قر اكىمشىلىك قۇقىق بۇزۋشىلىق تۋرالى كودەكسى “بۋللينگ, كيبەربۋللينگ” بابى بويىنشا جاۋاپتىلىق ەسكەرتۋ جاساۋعا نەمەسە 10 اەك مولشەرىندە ايىپپۇل سالۋعا اكەپ سوعادى.

«سوت ر-دىڭ اناسىنا اكىمشىلىك جازا تاعايىنداۋ كەزىندە ونىڭ اسىراۋىندا كامەلەتكە تولماعان ءۇش بالاسى بارىن, جۇمىسىنىڭ جوقتىعىن جانە تۇراقتى تابىسىنىڭ بولماۋىن, جاۋاپتىلىقتى اۋىرلاتاتىن ءمان-جايلاردىڭ انىقتالماعانىن ەسكەردى. سوت ر-دىڭ اناسىن كودەكستىڭ 127-2-بابىنىڭ 1-بولىگىمەن كىنالى دەپ تانىپ, وعان اكىمشىلىك جازا – ەسكەرتۋ تاعايىندادى. قاۋلى زاڭدى كۇشىنە ەنگەن جوق», – دەپ حابارلادى ۆەدومستۆودان.

ءدال وسىعان ۇقساس جاعداي قوستاناي وبلىسىندا تىركەلگەن.  ب.مايلين اتىنداعى اۋداندىق سوتىندا اقبتك-ءنىڭ 127-2-بابىنىڭ 3-بولىگىمەن وسىعان ۇقساس اكىمشىلىك قۇقىق بۇزۋشىلىق تۋرالى ءىس قارالدى. قىزعا بۋللينگ جاساعان كامەلەتكە تولماعان بالانىڭ اتا-اناسى جازالاندى.

مەكتەپتە ءجاسوسپىرىم وقۋشى قىزدى جۇيەلى تۇردە قورلاپ, قورقىتىپ, كەلەمەجدەگەنى انىقتالدى.

سوتتا س-نىڭ اكەسى ءوز كىناسىن تولىق مويىنداپ, ۇلىمەن بولعان اڭگىمەنى باياندادى.

اتا-اناسىنا بالاسىنىڭ ءجونسىز مىنەز-قۇلقى تۋرالى بۇعان دەيىن دە اۋىزشا ەسكەرتۋ جاسالعانىن ەسكەرىپ, سوت 25 مىڭ 800 تەڭگە ايىپپۇل سالدى.

قاۋلى زاڭدى كۇشىنە ەنگەن جوق.

ەسكە سالايىق, بۇعان دەيىن شىعىس قازاقستاندا جاسوسپىرىمدەر وقۋشى قىزدى ۇرىپ-سوعىپ, كەشىرىم سۇراۋعا ماجبۇرلەگەنىن جازدىق. وقۋشىنى بوپسالاپ تۇرعان ءۇش قىزدىڭ ءبىرى ۆيدەو ءتۇسىرىپ تۇر. قالعان ەكەۋى تەمەكى تارتىپ, قىزعا اۋزىنا كەلگەنىن ايتىپ, ءتىل تيگىزدى.