«ەكىگە بولۋگە ءماجبۇر بولدىق»: قۇتقارۋشىلار مايقايىڭ كەنىشىنەن اۆتوبۋس جۇرگىزۋشىسىنىڭ دەنەسىن قالاي تاپقانىن ايتتى

فوتو: پاۆلودار وبلىسىنىڭ توتەنشە جاعدايلار دەپارتامەنتى

قۇتقارۋشىلار پاۆلودار وبلىسىندا «مايقايىڭ-التىن» اق كەنىشىنە قۇلاعان اۆتوبۋس جۇرگىزۋشىسىنىڭ دەنەسىن قالاي ىزدەپ, تاپقانىن ايتىپ بەردى. بۇل تۋرالى Stan.kz اقپارات اگەنتتىگى حابارلايدى.

ءتورت شاحتا قۇتقارۋشىسىنىڭ سوڭعىسىنىڭ ءمايىتىن ىزدەۋگە قاتىسقاندار اۆتوبۋستى «ەكىگە بولۋگە» ءماجبۇر بولعانىن ايتتى. 2024 جىلدىڭ 4 قاڭتارىندا «مايقايىڭ-التىن» كەنىشى اۋماعىنداعى شۇڭقىرعا ادامدار مىنگەن اۆتوبۋس قۇلاعان ەدى.

«24 شىلدەدە ماماندار اۆتوبۋستىڭ شەتىن تاۋىپ, ونى اقىرىنداپ قازۋعا كىرىستى. 25 شىلدە كۇنى تاڭەرتەڭ ىزدەۋ جۇمىستارى جالعاسىپ, ولار اۆتوبۋستى قازىپ, قيراعان جەردەن الدى, الايدا ونى شىعارۋ مۇمكىن بولمادى. سەبەبى اۆتوبۋستىڭ ءىشى توپىراققا تولعان جانە جۇرگىزۋشىسى بار ەدى. سوسىن قۇتقارۋشىلار اۆتوبۋستى ەكى كۇن دەگەندە ەكىگە ءبولدى. اۆتوبۋستى كەسكەننەن كەيىن ولار مارقۇمنىڭ اياعىن كورىپ, دەنەنى تولىقتاي سىرتقا شىعارىپ الدى», – دەدى «مايقايىڭ-التىن» اق باس ديرەكتورى قايروللا جۇرسىنباەۆ.

«مايقايىڭ-التىن» اق باس ديرەكتورىنىڭ ايتۋىنشا, 55 جاستاعى اۆتوبۋس جۇرگىزۋشىسى ايىپ تىلەۋبەرگەنوۆتىڭ دەنەسى 25 شىلدە كۇنى ساعات 16:06-دا تابىلىپ, ءبىر ساعاتتان كەيىن جەر بەتىنە شىعارىلدى.

«ىزدەۋ ءجۇرىپ جاتقانىمەن, اسا قاۋىپتى بولدى. توپىراق ەكى رەت وپىرىلدى, كىشكەنە كۇتىپ, قايتا جۇمىسقا كىرىستىك. ءۇشىنشى شاحتا قۇتقارۋشىسىنىڭ دەنەسىن كراتەردىڭ تۇبىنەن شامامەن 12 مەتر تەرەڭدىكتەن تابىلدى. ال اۆتوبۋس ودان 6-7 مەتر تەرەڭدىكتە بولعان. ال قالعان قۇتقارۋشىلار اۆتوبۋس قۇلاپ بارا جاتقان كەزدە سەكىرگەن بولۋى مۇمكىن», – دەدى جۇرسىنباەۆ.

التى اي بويى جەر استىندا جاتقان ءمايىت ساراپتاما جاساۋ ءۇشىن تەرگەۋ توبىنا تاپسىرىلدى.

رەسمي مالىمەت بويىنشا, توتەنشە جاعداي ورنىندا ىزدەۋ-قۇتقارۋ تاۋلىك بويى جۇرگىزىلدى. ءتۇرلى ماماندار مەن ساراپشىلار, تاۋ-كەن ارداگەرلەرى, كينولوگتار, ارنايى تەحنيكالار مەن دروندار جۇمىلدىرىلىپ, وبلىستاعى بارلىق توتەنشە جاعدايلار قىزمەتىنىڭ كۇشى جۇمىلدىرىلدى. ءتۇرلى قىزمەتتىڭ 200-دەن استام قىزمەتكەرى توتەنشە جاعداي ورنىندا بولدى.

ايتا كەتەيىك, بۇعان دەيىن پاۆلودار وبلىسىندا بيىل قاڭتار ايىنىڭ باسىندا اۆتوبۋسپەن بىرگە ەسكى شاحتانىڭ شۇڭقىرىنا قۇلاپ كەتكەن ءتورت قۇتقارۋشىنىڭ سوڭعىسىنىڭ دەنەسى تابىلعانىن حابارلاعان ەدىك. قۇتقارۋشى ءارى جۇرگىزۋشى ايىپ تىلەۋبەرگەنوۆتىڭ ءمايىتى 25 شىلدەدە ساعات 16:20-دا تابىلعان.

ەسكە سالساق, بۇعان دەيىن پاۆلودار وبلىسىنداعى مايقايىڭ كەنىشى ماڭىندا قۇتقارۋشىلار مىنگەن اۆتوبۋس شۇڭقىرعا ءتۇسىپ كەتكەنى تۋرالى جازعان ەدىك.