«Ekige bólýge májbúr boldyq»: Qutqarýshylar Maıqaıyń kenishinen avtobýs júrgizýshisiniń denesin qalaı tapqanyn aıtty

Foto: Pavlodar oblysynyń Tótenshe jaǵdaılar departamenti

Qutqarýshylar Pavlodar oblysynda «Maıqaıyń-altyn» AQ kenishine qulaǵan avtobýs júrgizýshisiniń denesin qalaı izdep, tapqanyn aıtyp berdi. Bul týraly Stan.kz aqparat agenttigi habarlaıdy.

Tórt shahta qutqarýshysynyń sońǵysynyń máıitin izdeýge qatysqandar avtobýsty «ekige bólýge» májbúr bolǵanyn aıtty. 2024 jyldyń 4 qańtarynda «Maıqaıyń-altyn» kenishi aýmaǵyndaǵy shuńqyrǵa adamdar mingen avtobýs qulaǵan edi.

«24 shildede mamandar avtobýstyń shetin taýyp, ony aqyryndap qazýǵa kiristi. 25 shilde kúni tańerteń izdeý jumystary jalǵasyp, olar avtobýsty qazyp, qıraǵan jerden aldy, alaıda ony shyǵarý múmkin bolmady. Sebebi avtobýstyń ishi topyraqqa tolǵan jáne júrgizýshisi bar edi. Sosyn qutqarýshylar avtobýsty eki kún degende ekige bóldi. Avtobýsty keskennen keıin olar marqumnyń aıaǵyn kórip, deneni tolyqtaı syrtqa shyǵaryp aldy», – dedi «Maıqaıyń-altyn» AQ bas dırektory Qaırolla Júrsinbaev.

«Maıqaıyń-altyn» AQ bas dırektorynyń aıtýynsha, 55 jastaǵy avtobýs júrgizýshisi Aıyp Tileýbergenovtiń denesi 25 shilde kúni saǵat 16:06-da tabylyp, bir saǵattan keıin jer betine shyǵaryldy.

«Izdeý júrip jatqanymen, asa qaýipti boldy. Topyraq eki ret opyryldy, kishkene kútip, qaıta jumysqa kiristik. Úshinshi shahta qutqarýshysynyń denesin kraterdiń túbinen shamamen 12 metr tereńdikten tabyldy. Al avtobýs odan 6-7 metr tereńdikte bolǵan. Al qalǵan qutqarýshylar avtobýs qulap bara jatqan kezde sekirgen bolýy múmkin», – dedi Júrsinbaev.

Alty aı boıy jer astynda jatqan máıit saraptama jasaý úshin tergeý tobyna tapsyryldy.

Resmı málimet boıynsha, tótenshe jaǵdaı ornynda izdeý-qutqarý táýlik boıy júrgizildi. Túrli mamandar men sarapshylar, taý-ken ardagerleri, kınologtar, arnaıy tehnıkalar men drondar jumyldyrylyp, oblystaǵy barlyq tótenshe jaǵdaılar qyzmetiniń kúshi jumyldyryldy. Túrli qyzmettiń 200-den astam qyzmetkeri tótenshe jaǵdaı ornynda boldy.

Aıta keteıik, buǵan deıin Pavlodar oblysynda bıyl qańtar aıynyń basynda avtobýspen birge eski shahtanyń shuńqyryna qulap ketken tórt qutqarýshynyń sońǵysynyń denesi tabylǵanyn habarlaǵan edik. Qutqarýshy ári júrgizýshi Aıyp Tileýbergenovtyń máıiti 25 shildede saǵat 16:20-da tabylǵan.

Eske salsaq, buǵan deıin Pavlodar oblysyndaǵy Maıqaıyń kenishi mańynda qutqarýshylar mingen avtobýs shuńqyrǵa túsip ketkeni týraly jazǵan edik.