ەكولوگيا مينيسترلىگى ورماندى ورتتەن قورعاۋ ءىس-قيمىلىنا كەپىلدىك بەرە الا ما

«ماتەريالدىق-تەحنيكالىق تۇرعىدا جابدىقتاپ جاتىرمىز جانە بۇل تۇرعىدا وڭتايلى ناتيجە بار. كەشەندى جوسپار اياسىندا 5 جىلعا 68 ملرد تەڭگە قاراستىرىلعان. بىلتىر 13,4 ميلليارد تەڭگە ءتۇستى, 300-دەن استام ءتۇرلى تەحنيكا مەن قوندىرعىلار ساتىپ الدىق. بيىل 15 ملرد تەڭگەگە جۋىق قارجى ءبولىندى. بىزدە ءورت ءسوندىرۋ تەحنيكاسى دا ەسكىرگەنىن ەسكەرە وتىرىپ, جاڭاسىن الامىز. قازىرگى كەزدە ءورت ءسوندىرۋ تەحنيكاسى پاركىنىڭ توزۋى 72 پايىز شاماسىندا. سونداي-اق توتەنشە جاعدايلار مينيسترلىگىمەن بىرلەسىپ وقۋ-جاتتىعۋلار وتكىزىپ جاتىرمىز. تمج وقۋ ورتالىعىندا 1332 ءورت قاۋىپسىزدىگى ينسپەكتورى وقىتىلدى. ياعني, ماماندار ءورت وشاعىنا جاقىنداماي-اق اۋەدەن وشىرە الادى. بارلىق ءتيىستى شارالار قابىلدانىپ جاتىر», — دەدى ە. نىسانباەۆ تىلشىلەر سۇراعىنا جاۋاپ بەرە وتىرىپ.

سونىمەن قاتار ول ۆەدومستۆو 2023 جىلى سەمەي ورمانىندا بولعان قايعىلى ورتتەن قانداي ساباق العانىن ايتتى.

«ەڭ ماڭىزدى ساباق — ءورت ءسوندىرۋ كەزىندەگى مەملەكەتتىك ورگانداردىڭ ءوزارا ءىس-قيمىلى. ءبىز حابارلاندىرۋ الگوريتمىن ايقىندادىق. مۇنىمەن قوسا, ءورت وشاعىن بارىنشا تەزىرەك انىقتاۋ قاجەت, سوندىقتان ءبىز ەرتە انىقتاۋ جۇيەسىن ەنگىزىپ جاتىرمىز. بىلتىر ەكى ۇلتتىق پاركتە وسىنداي جۇيەلەردى ورناتتىق. ەڭ باستىسى, جەدەل دەن قويۋ جانە باسقا مەملەكەتتىك ورگاندارمەن ءوزارا ارەكەتتەسۋدى قامتاماسىز ەتۋگە ەكپىن قويۋ كەرەك. اتاپ ايتقاندا, وتكەن جىلدارداعى ورتتەردىڭ قايتالانباۋىنا بار كۇش-جىگەرىمىزدى سالامىز», — دەدى مينيستر.