Ekologtar pikiri: Kaspıı teńizi qyzyl túske boıaldy

Foto: @112_aktau / Instagram

Aqtaýda 1-shaǵynaýdandaǵy Kaspıı teńiziniń jaǵalaýy qyzyl túske boıalǵan. Jergilikti turǵyndar dabyl qaǵyp otyr, alaıda ekologtar aqtaýlyqtardy sabyrǵa shaqyrdy, dep habarlaıdy qandastar.kz

Jergilikti turǵyndar bul qubylysqa keıbir hımııalyq tógindiler áser etýi múmkin dep topshylady. Al ekologtar bul qarapaıym qubylys ekenin aıtyp, ekologııa men adamdarǵa qaýip tóndirmeıdi dep sendirdi.

«Bul — ár qys saıyn jıi kezdesetin tabıǵı qubylys. Ásirese, qar jaýsa, aq tús pen ashyq qyzyl tús qorqynyshty kórinedi. Qońyr baldyrlar osyndaı tús beredi», — dep túsindirdi «Eko Mańǵystaý» ÚEU basshysy Kırıll Osın.

Ekologtar sýyq mezgilde baldyrlar kóbeıip, gúldeıtinin aıtty, bul osyndaı «qorqynyshty» jaǵdaı týyndaýyna yqpal etedi eken.

Mańǵystaýdyń Ekologııa departamenti de teńiz baldyrlarynyń áserinen jaǵa qyzyl túske boıalǵanyn málimdedi, biraq synamalar alynǵan.

«Dostar» jaǵajaıy, «Nur-Plaza» jáne ıahta klýby aýmaǵynan synamalar alyndy. Taldaýlarǵa súıensek, teńizde hımııalyq áser tabylǵan joq. Baldyrlar eshqandaı zııan keltirmeıdi. Bul — tabıǵı qubylys, sondyqtan alańdamańyzdar», — dep túsindirdi Mańǵystaýdyń ekologııalyq zertteý zerthanasynyń gıdrobıologııa bóliminiń zerthanashysy Nurbolat О́temisov.