Ekonomıka mınıstri Jumanǵarın jýrnalısterdi «jyn-shaıtanǵa» teńep, synǵa qaldy

Májilis kýlýarynda ulttyq ekonomıka mınıstri Serik Jumanǵarın jýrnalısterge orynsyz ázil aıtamyn dep taǵy synǵa qaldy. Ol Dostoevskııdiń «Besy» romanyn meńzegen, dep habarlaıdy Qandastar.kz aqparat portaly.

«Buqaralyq aqparat quraly qalaı atalady? «Bes», ıá? Ataýy qyzyq eken. Roman jelisi boıynsha, shyǵar, ıá? Fedor Mıhaılovıchtiń, solaı emes pe? Sizder nemese «Orda» jazady… «Ordaǵa» jyndar kirip ketti», – dep birtúrli qaljyńdady sheneýnik.

Jumanǵarınniń bulaı deýine 23 maýsym kúni senatta ótken brıfıngtegi qylyǵy týraly BAQ betterinde jarııalanǵan synı maqalalar sebep boldy.  BES.media portalynyń jýrnalısi Jumanǵarınnen Astana halyqaralyq qarjy ortalyǵy arqyly 200 mıllıard teńgeden astam salyq tóleýden jaltarǵan kompanııanyń atyn ataýdy suraǵan. Sheneýnik mıkrofonyn óshirip, brıfıngten ketip qalǵan. Osy jaıtty jýrnalıster synap jazǵan edi.

Mınıstr BAQ-taǵy synmen kelispedi.

«Jumanǵarın brıfıngti erte japty». Taǵy kim? Men brıfıngti japqannan keıin siz qosymsha suraq qoıýdy ótindińiz. Solaı ǵoı? Men brıfıngti japqannan keıin! Nege sony jazbaısyz? Maǵan sizge deıin eki spıker qoıǵan suraqty qoıyp tursyz», – dedi ol.