ەكس-دەپۋتاتتىڭ قىزى اكەسىن سوتتا جەڭىپ شىقتى

 فوتو: stan.kz

استانالىق ايبوتا راقىمبەكوۆا “اۋىل” پارتياسى توراعاسىنىڭ ءبىرىنشى ورىنباسارى, ەكس-دەپۋتات جانە پرەزيدەنتتىككە كانديدات بولعان اكەسى تولەۋتاي راقىمبەكوۆتى سوتتا جەڭىپ شىقتى. وگەي اكەسىنىڭ وعان جالا جاۋىپ, ار-نامىسىنا تيەتىن سوزدەر جاريالاعانى دالەلدەندى, دەپ qandastar.kz Stan.kz-كە سىلتەمە جاساپ حابارلايدى.

ايبوتا راقىمبەكوۆا ونى اكەسى تولەۋتاي راقىمبەكوۆ زورلاعانىن جەلىدە ايتىپ, ادىلدىكتى تالاپ ەتكەن ەدى. ايتۋىنشا, بالا كۇنىندە اكەسى ونى ەكى رەت زورلاپ, كەيىن اناسىنان قالعان مۇرانىڭ ءبىر بولىگىن زاڭسىز تارتىپ العان. وزىنە تيەسىلى مۇلكىنەن ايىرىلعان ول 1,5 جاسار بالاسىمەن بىرگە داعدارىس ورتالىعىندا تۇرادى.

كەيىن ەكس-دەپۋتات بۇل مالىمدەمەگە جاۋاپ بەرىپ, قىزىن ەسىرتكىگە تاۋەلدى, پاتولوگيالىق وتىرىكشى دەگەن ەدى. الايدا ايبوتا مۇنى جالا دەپ “جەكە باسىن قورلاۋ” بويىنشا شاعىم تۇسىرگەن.

22 قاڭتاردا سوت تولەۋتاي راقىمبەكوۆتىڭ ءسوزىن جالعان دەپ تانىپ ايبوتانىڭ پايداسىنا شەشىم شىعاردى.

“ەلىمىزدىڭ سوت جۇيەسى اقىرى مەنىڭ ءىسىمدى وبەكتيۆتى قاراپ, ءادىل شەشىمىن شىعاردى! قازىر “الاياقتىق» بابى بويىنشا قىلمىستىق ءىستىڭ سوتقا دەيىنگى تەرگەۋى ءجۇرىپ جاتىر. ياعني اكەم مەنى الداپ, مۇرامنان ايىرعانى ءۇشىن سوتقا بەرگەن ەدىم. بۇعان دەيىن تولەۋتاي راقىمبەكوۆ مەنى وتىرىكشى, ناشاقور دەپ ايىپتاعان. بۇل جالعان اقپارات مەنىڭ اتىما كىر كەلتىرىپ قانا قويماي, باسقالاردىڭ الدىندا ابىرويىمدى ءتۇسىردى. ءادىل شەشىم شىعارىپ, شىندىقتى ەستي العانى ءۇشىن سوتقا العىسىمدى بىلدىرەمىن. بۇل شەشىم مەن ءۇشىن جاي عانا جەڭىس ەمەس – بۇل ادىلدىك بارىن ەسكە ءتۇسىرىپ, سەنىمدى قايتا جاققان كۇن”, – دەدى جابىرلەنۋشى.

ەسكە سالساق, بۇعان دەيىن ەكس-دەپۋتات تولەۋتاي راقىمبەكوۆتىڭ قىزى اكەسى بالا كۇنىندە زورلاعانىن ايتىپ, ادىلدىككە قول جەتكىزە الماي جۇرگەنىن ايتقان.