ەكس-ءمينيستردىڭ اعاسى جازالاندى

بۇرىنعى ترۋزيم جانە سپورت ءمينيسترى ەرمەك مارجىقپاەۆتىڭ ۇلكەن اعاسى ءارى جاتتىقتىرۋشى ەرىك مارجىقپاەۆ اقتاۋداعى جاستار اراسىنداعى قازاقستان چەمپيوناتى كەزىندە سۋديانى ۇرىپ جىبەردى, دەپ qandastar.kz اقپارات پورتالى قازاقستان بوكس فەدەراتسياسىنا سىلتەمە جاساپ حابارلايدى.

ول تۋرالى ۆيدەو الدىمەن Kozachkow offside Telegram-ارناسىنا جاريالانعان.

«2024 جىلعى 5 جەلتوقساندا اقتاۋ قالاسىندا وتكەن جاستار اراسىنداعى چەمپيونات بارىسىندا اقمولا وبلىسىنىڭ سپورتشىسى دامير يبراگيموۆ پەن استانا قالاسىنىڭ سپورتشىسى كەنەسارىامير مارجىقپاەۆ كەزدەستى. جەكپە-جەك 4:1 ەسەبىمەن اياقتالىپ, دامير يبراگيموۆ جەڭىسكە جەتتى. جەكپە-جەك اياقتالعاننان كەيىن استانا قالاسىنىڭ جاتتىقتىرۋشىسى (كەنەسارىامير مارجىقپاەۆتىڭ اكەسى) ەرىك مارجىقپاەۆ سۋديالاردىڭ شەشىمىنە نارازىلىعىن ءبىلدىرىپ, بالاعات سوزدەر ايتىپ, تورەشىلەر القاسىنا قاتىستى اگرەسسيا قولداندى. بۇل فيزيكالىق قاقتىعىسقا ۇلاستى», – دەلىنگەن فەدەراتسيا مالىمدەمەسىندە.

بوكسشىلار اۋلەتىنىڭ وكىلى ەرىك مارجىقپاەۆتىڭ كەيىن ارىپتەستەرىنەن كەشىرىم سۇراعانى دا ناقتىلاندى.

«قازاقستان بوكس فەدەراتسياسى سپورت ەتيكاسىن بۇزعان جاتتىقتىرۋشى ە. مارجىقپاەۆتى جارىستاردان شەتتەتۋ تۋرالى شەشىم قابىلداۋ ءۇشىن اتقارۋ كوميتەتى بيۋروسىنىڭ وتىرىسىن وتكىزدى. بيۋرو وتىرىسىنىڭ قورىتىندىسى بويىنشا جاتتىقتىرۋشىلارعا, تورەشىلەرگە, جارىستى ۇيىمداستىرۋشىلارعا قۇرمەتسىزدىك تانىتقانى, سونداي-اق قازاقستان رەسپۋبليكاسىنىڭ سپورتتىق ەتيكاسىن بۇزعانى ءۇشىن جاتتىقتىرۋشى ە. مارجىقپاەۆتى 2 جىل مەرزىمگە بوكستان وڭىرلىك, رەسپۋبليكالىق جانە حالىقارالىق جارىستارعا قاتىسۋدان شەتتەتۋ تۋرالى شەشىم قابىلداندى», – دەپ مالىمدەدى قازاقستان بوكس فەدەراتسياسى.