«ەكس-پروكۋرورمىن دەپ سەس كورسەتتى»: تۇركىستاندا كولىك قاققان 13 جاستاعى بالانىڭ اتا-اناسى ادىلدىك سۇرايدى

فوتو: https: kp.ru/expert

تۇركىستان وبلىسىندا جول اپاتىنان جاراقات العان ءجاسوسپىرىمنىڭ تۋىستارى ادىلدىك ىزدەيدى. 13 جاستاعى سايات سەرىك ۇلى ۆەلوسيپەدىمەن كولىككە سوعىلىپ, بەس قابىرعاسى سىنعان ەكەن. اتا-اناسى تەرگەۋ تىم باياۋ ءجۇرىپ جاتىر دەيدى. بۇل تۋرالى Stan.kz اقپارات اگەنتتىگى 31-ارنانىڭ ينفورمبيۋرو جاڭالىقتار باعدارلاماسىنا سىلتەمە جاساپ حابارلايدى.

ۆەلوسيپەد تىزگىندەگەن 13 جاستاعى سايات سەرىك ۇلىن ءبىر اي بۇرىن كولىك قاعىپ كەتكەن. جول اپاتىنان جەتكىنشەكتىڭ بەس قابىرعاسى سىنىپ, قازىر ول قوزعالا المايدى. ونىمەن قويماي بالانى قاعىپ كەتكەن جۇرگىزۋشى وزىن ەكس-پروكۋرورمىن دەپ تانىستىرعان ەكەن. سوندىقتان جابىرلەنۋشى تاراپ ءىس قىسقارتىلىپ, كىنالى ادام جازاسىز قالا ما دەپ قورقادى.

“ول كىسى “مەن پروكۋرور بولىپ جۇمىس ىستەگەنمىن, ەشنارسەدەن قورىقپايمىن. مەنىڭ ادامدارىم كوپ” دەدى. مەن وسى ءىس قىسقارىپ كەتە مە دەپ قورقامىن. تەرگەۋشىلەر بالاعا “ۆەلوسيپەدىمنىڭ تەجەگىشى ۇستاماي, كەلە جاتقان ماشيناعا سوعىستىق” دەپ جازدىرعان. شىنىندا ونداي ەمەس. ويتكەنى ونۆ بىلتىر عانا العانبىز, جاڭا”, – دەدى سايات سەرىك ۇلىنىڭ اناسى جىبەك بازاروۆا.

كوپبالالى انانىڭ ايتۋىنشا, كولىكتىڭ يەسى بالاڭدى قاراۋسىز قالدىردىڭ دەپ اناسىن كىنالاعان. ءتىپتى ساياتتىڭ اتا-اناسىنان شىعىندى وتەپ بەرۋدى سۇراپتى.

كولىك جۇرگىزۋشى پروكۋراتۋرادا جۇمىس ىستەيتىنى تۋرالى اقپاراتتى جالعان دەيدى. ال ۆەلوسيپەد تىزگىندەگەن جەتكىنشەكتىڭ تۋىستارىنان وتەماقى سۇراعانىن راستايدى.

“مەن ونى بارىپ قاققان جوقپىن. كەرىسىنشە ولار ماعان كەلىپ سوعىستى. ماعان 148 مىڭ تەڭگە ايىپپۇل تاعايىنداپ, 610-باپتىڭ ءبىر تارماقتارىن ايتتى. مەن ونىمەن كەلىسپەيمىن دەپ پروكۋراتۋراعا ارىز جازدىم”, – دەدى تۇركىستاندىق نۇرلىبەك.

پوليتسيا «كولiك قۇرالدارىن باسقاراتىن ادامداردىڭ جول ءجۇرىسى نەمەسە پايدالانۋ قاعيدالارىن بۇزۋى» بابى بويىنشا تەرگەۋ ءالى اياقتالماعانىن جەتكىزدى. الايدا دەنساۋلىعىنا زاقىم كەلگەن بالانىڭ اناسى ءبىر ايدان بەرى سوت ساراپتاماسى شىقپاعانىن ايتادى. سوندىقتان جىبەك بازاروۆا پروكۋراتۋراعا ارىزدانباق.