«ەل مۇددەسى ءۇشىن وت پەن سۋعا تۇسكەنىم ءۇشىن ساتقىن بولعانىم با»: تاسماعامبەتوۆ ءوزىن ايىپتاعاندارعا جاۋاپ بەردى

فوتو: سكرين

الەۋمەتتىك جەلىدە ايىپتاۋلارعا تاپ بولعان ۇقشۇ توراعاسى يمانعالي تاسماعامبەتوۆ قازاقستاندىقتارعا مالىمدەمە جاسادى. بۇل تۋرالى qandastar.kz  اقپارات اگەنتتىگى حابارلايدى.

كەيبىر جەلى قولدانۋشىلارى تاسماعامبەتوۆتىڭ ۇجىمدىق قاۋىپسىزدىك تۋرالى شارت ۇيىمى قىزمەتى مەن ەلگە دەگەن ادالدىعىنا كۇمان كەلتىرگەن ەدى. كەيبىرى ونى «رەسەيشىل», «ساتقىن» دەپ تە ايىپتادى.

Stan.kz جازعانداي, تاسماعامبەتوۆ وسىعان قاتىستى پىكىرىن ءبىلدىردى. 

“اقيقات تەك كوزگە كورىنەتىن دۇنيە ەمەس, ول جۇرەكپەن سەزىلىپ, اردىڭ تارازىسىنا سالىنادى. الەۋمەتتىك جەلى جاۋاپسىزدىق پەن جالعان اقپاراتتىڭ تەز تاراۋىنا جول اشادى. ازاماتتاردى ار الدىنداعى جاۋاپكەرشىلىكتى ۇمىتپاۋعا شاقىرامىن”, – دەدى ول.

تاسماعامبەتوۆ ۇقشۇ-داعى قىزمەتىن دە قازاقستاننىڭ قاۋىپسىزدىگى مەن ەل مۇددەسىن قورعاۋعا ارناعانىن ايتتى. سونداي-اق ەلى ءۇشىن كەز كەلگەن سىناققا ءتوزۋ – وزىنە مارتەبە ەكەنىن جەتكىزدى.

«كەيبىر باقىتسىز جاندار مەنى «رەسەيشىل», «ورىسشىل» دەپ قارالاپ ءجۇر. كەلىسسوزدىڭ كۇشى ەمەس, زىمىراننىڭ مىسى باسىپ تۇرعان زاماندا, ۇجىمدىق قاۋىپسىزدىك شارتى ۇيىمىنا تۋعان ەلىمنىڭ اتىنان بارىپ, مەملەكەتتىڭ مۇددەسى ءۇشىن وت پەن سۋعا تۇسكەنىم ءۇشىن ساتقىن بولعانىم با?.. قادىرىمدى بىلمەگەندەردىڭ اراسىندا ەڭسەمدى تۇسىرگىم كەلمەيدى. جالعان ءسوز – جارا, ال ار – شىندىقتىڭ قالقانى», – دەدى ول.

ول قازاقستاندىقتاردى جەلىدە تاراعان كەز كەلگەن اقپاراتقا سىن كوزبەن قاراۋعا شاقىردى.

ء“ابىش كەكىلباەۆ «ارلى ادام – ەڭ كۇشتى ادام» دەگەن. قازىرگى كۇردەلى گەوساياسي جاعدايدا ۇلت بىرلىگى مەن رۋحاني تاۋەلسىزدىكتىڭ ماڭىزى ەرەكشە. ۋكراينا مەن رەسەيدىڭ اراسىنداعى قانتوگىستە جەڭىمپاز بولمايدى. ءبارى دە جەڭىلەدى. مۇنداي جاعدايدا بىرەۋدىڭ سويىلىن سوعۋ ناعىز سوقىرلىق. ال ءوز ۇلتىنا سوعىس تىلەۋ ناعىز قانىپەزەرلىك. قازىر شەتەلدە قىزمەت ەتىپ جۇرسەم دە, ويىم مەن جۇرەگىم ءاردايىم قازاقستانمەن بىرگە. ەلدىڭ ءار جەتىستىگىن ءوزىمنىڭ جەڭىسىمدەي قابىلدايمىن. قىزمەت بارىسىندا ەشقاشان ۇياتقا قالدىرار ارەكەتكە بارمادىم, حالىق الدىندا دا, ار الدىندا دا ءجۇزىم اشىق”, – دەدى تاسماعامبەتوۆ.

تاسماعامبەتوۆ بۇل ۇندەۋى ارقىلى قوعامدى سابىرلىققا, اۋىزبىرشىلىك پەن پاراساتقا شاقىردى. مالىمدەمەسىن قاسيەتتى ورازا ايت مەرەكەسىمەن قۇتتىقتاۋمەن اياقتاپ, حالىققا بىرلىك پەن بەرەكە تىلەدى.

ايتا كەتەيىك, بۇعان دەيىن ۇقشۇ ەگەر ەۋروپا ەلدەرى ۋكرايناعا اسكەر كىرگىزگەن جاعدايدا نە بولاتىنىن ايتقان ەدى. ۇقشۇ ءباسپاسوز حاتشىسى ناتاليا حاريتونوۆا ۇيىم قاجەتتى كومەك سۇراعان مەملەكەتكە ءارتۇرلى كومەك كورسەتۋ مۇمكىندىكتەرىن ۇسىنۋعا دايىن ەكەنىن ايتقان. كەيىننەن جەلىدە وسى ءسوزدى يمانعالي تاسماعامبەتوۆ ايتتى دەگەن اقپاراتتار تاراعان ەدى.