«El múddesi úshin ot pen sýǵa túskenim úshin satqyn bolǵanym ba»: Tasmaǵambetov ózin aıyptaǵandarǵa jaýap berdi

Foto: skrın

Áleýmettik jelide aıyptaýlarǵa tap bolǵan UQShU tóraǵasy Imanǵalı Tasmaǵambetov qazaqstandyqtarǵa málimdeme jasady. Bul týraly qandastar.kz  aqparat agenttigi habarlaıdy.

Keıbir jeli qoldanýshylary Tasmaǵambetovtyń Ujymdyq qaýipsizdik týraly shart uıymy qyzmeti men elge degen adaldyǵyna kúmán keltirgen edi. Keıbiri ony «reseıshil», «satqyn» dep te aıyptady.

Stan.kz jazǵandaı, Tasmaǵambetov osyǵan qatysty pikirin bildirdi. 

“Aqıqat tek kózge kórinetin dúnıe emes, ol júrekpen sezilip, ardyń tarazysyna salynady. Áleýmettik jeli jaýapsyzdyq pen jalǵan aqparattyń tez taraýyna jol ashady. Azamattardy ar aldyndaǵy jaýapkershilikti umytpaýǵa shaqyramyn”, – dedi ol.

Tasmaǵambetov UQShU-daǵy qyzmetin de Qazaqstannyń qaýipsizdigi men el múddesin qorǵaýǵa arnaǵanyn aıtty. Sondaı-aq eli úshin kez kelgen synaqqa tózý – ózine mártebe ekenin jetkizdi.

«Keıbir baqytsyz jandar meni «reseıshil», «orysshyl» dep qaralap júr. Kelissózdiń kúshi emes, zymyrannyń mysy basyp turǵan zamanda, Ujymdyq qaýipsizdik sharty uıymyna týǵan elimniń atynan baryp, memlekettiń múddesi úshin ot pen sýǵa túskenim úshin satqyn bolǵanym ba?.. Qadirimdi bilmegenderdiń arasynda eńsemdi túsirgim kelmeıdi. Jalǵan sóz – jara, al ar – shyndyqtyń qalqany», – dedi ol.

Ol qazaqstandyqtardy jelide taraǵan kez kelgen aqparatqa syn kózben qaraýǵa shaqyrdy.

“Ábish Kekilbaev «Arly adam – eń kúshti adam» degen. Qazirgi kúrdeli geosaıası jaǵdaıda ult birligi men rýhanı táýelsizdiktiń mańyzy erekshe. Ýkraına men Reseıdiń arasyndaǵy qantógiste jeńimpaz bolmaıdy. Bári de jeńiledi. Mundaı jaǵdaıda bireýdiń soıylyn soǵý naǵyz soqyrlyq. Al óz ultyna soǵys tileý naǵyz qanipezerlik. Qazir shetelde qyzmet etip júrsem de, oıym men júregim árdaıym Qazaqstanmen birge. Eldiń ár jetistigin ózimniń jeńisimdeı qabyldaımyn. Qyzmet barysynda eshqashan uıatqa qaldyrar áreketke barmadym, halyq aldynda da, ar aldynda da júzim ashyq”, – dedi Tasmaǵambetov.

Tasmaǵambetov bul úndeýi arqyly qoǵamdy sabyrlyqqa, aýyzbirshilik pen parasatqa shaqyrdy. Málimdemesin qasıetti Oraza aıt merekesimen quttyqtaýmen aıaqtap, halyqqa birlik pen bereke tiledi.

Aıta keteıik, buǵan deıin UQShU eger Eýropa elderi Ýkraınaǵa ásker kirgizgen jaǵdaıda ne bolatynyn aıtqan edi. UQShU baspasóz hatshysy Natalıa Harıtonova uıym qajetti kómek suraǵan memleketke ártúrli kómek kórsetý múmkindikterin usynýǵa daıyn ekenin aıtqan. Keıinnen jelide osy sózdi Imanǵalı Tasmaǵambetov aıtty degen aqparattar taraǵan edi.