Jańalyqtar
El óńirlerinde sý tasqynyna qarsy belsendi is-sharalar jalǵasýda
![](https://qandastar.kz/wp-content/uploads/2024/03/IMG_4734-780x405.jpeg)
Aýa temperatýrasynyń kúrt jylynýy jáne qardyń tez erýine baılanysty elimizdiń jekelegen óńirlerinde sý tasqyny jaǵdaıy kúrdelene tústi.
Búgingi tańda eń kúrdeli jaǵdaı Aqtóbe jáne Qostanaı oblystarynda oryn aldy. Qalyptasqan sý tasqyny jaǵdaıyna baılanysty elimizde TJM men óńirlerde jedel shtabtardyń jumys isteýde. Jedel jeli telefony iske qosyldy: : TJM 8 717 2 70 41 14, Aqtóbe oblysy TJD 8 713 2 54 86 57, Batys Qazaqstan oblysy TJD 8 711 2 55 40 88.
11 óńirde ákimdikter men TJD ókilderiniń kezekshiligi uıymdastyryldy. Sý aıdyndary men sý tasqyny jaǵdaıyna monıtorıng júrgizý boıynsha jumystar jalǵasýda.
Erigen qar sýymen kúresý úshin Aqtóbe jáne Qostanaı oblystaryna Mańǵystaý, Qyzylorda oblystary men 52859, 20982 áskerı bólimderinen 220-ǵa jýyq jeke quram men 25-ten astam tehnıkadan qosymsha kúshter men quraldar jiberildi.
Avarııalyq-qutqarý jumystaryna barlyǵy 1,5 myńǵa jýyq adam, 500-den astam tehnıka, 200-ge jýyq birlik sý aıdaý jáne júzý quraly jumyldyryldy.
TJM men ákimdikterdiń jumyldyrylǵan kúshteri men quraldary 320 myńnan astam tekshe metr sý soryldy, ınterentti materıaldar salynǵan 7 myńnan astam qap tóseldi. Eń qaýipti ýchaskelerde nyǵaıtý jumystary júrgizilýde.
Aqtóbe oblysyndaǵy Shubarqudyq aýylynda sý basqan 5 jeke turǵyn úıden, 34 aýla aýmaǵynan sýdy soryp shyǵarý jumystary jalǵasýda. Jalpy oblys boıynsha sý basqan úıler men aýla aýmaqtarynan 51 myńnan astam tekshe metr erigen qar sýy soryldy, ınertti materıaldar salynǵan 7,9 myńnan astam qap tóseldi. 543 tekshe metr qar shyǵaryldy.
Qostanaı oblysynyń Qostanaı, Arqalyq qalalarynda, Amangeldi jáne Jangeldi aýdandarynda erigen qar sýyn sorý jumystary júrgizilýde. Arqalyq qalasynda 20 aýla aýmaǵy, onyń ishinde 12 jeke turǵyn úı sý astynda qaldy. Úzdiksiz júrgizilgen sý sorý jumystarynyń nátıjesinde Arqalyq qalasynyń turǵyn úılerinen sý tolyǵymen shyǵaryldy. Barlyǵy 6848 tekshe metr sý soryldy. Eldi mekenderdi sý basý qaýpi joq. Qazirgi ýaqytta jaǵdaı turaqty.
Sý tasqynyna qarsy is-sharalar jalǵasýda.