ەلدە ەندى ەڭ تومەنگى كۇنكورىس دەڭگەيى جاڭا تارتىپپەن ەسەپتەلمەك

فوتو: اشىق دەرەككوز

ەڭبەك جانە حالىقتى الەۋمەتتىك قورعاۋ مينيسترلىگى ەلدەگى كۇنكورىس دەڭگەيىن مەديانالىق تابىس دەڭگەيى ارقىلى انىقتاۋدى جوسپارلاپ وتىر. سايكەسىنشە ورتاشا جالاقى ارقىلى ەسەپتەلەدى. ناتيجەسىندە ەلدە بەلگىلەنگەن كەدەيلىك شەگى ءوسۋى مۇمكىن. بۇل تۋرالى Stan.kz اقپارات اگەنتتىگى 31-ارنانىڭ “ينفورمبيۋرو” باعدارلاماسىنا سىلتەمە جاساپ حابارلايدى.

رەسمي ستاتيستيكاعا سۇيەنسەك, ەلدە بەلگىلەنگەن كەدەيلىك شەگى حالىقارالىق ستاندارتتاردان ايتارلىقتاي تومەن. سوندىقتان ۇكىمەت جاڭا جۇيەگە كوشپەك.

“وسى مەديانالىق تابىسقا كوشكەنىمەن, مينيسترلىك مەديانالىق تابىستىڭ قانداي بولىگى ەسەپتەلەتىنىن ايتقان جوق. دەگەنمەن بۇعان وتكەن كەزدە كەدەيلىك شەگىنىڭ مولشەرى ۇلعاياتىنى انىق جانە دە الەۋمەتتىك جاردەماقىمەن قامتاماسىز ەتىلەتىندەردىڭ سانى ارتادى”, – دەدى ساراپشى سانجار قالداروۆ.

ال ەكونوميستەر ەڭ تومەنگى جالاقىدان دا از ايلىق الاتىن جانداردىڭ دا زا ەمەسىن ايتادى. ماسەلەن, بىلتىر ولاردىڭ سانى ءبىر ميلليوننان اسقان. سوندىقتان كۇنكورىس دەڭگەيىن ەسەپتەگەندە حالىقتىڭ باسقا دا قاجەتىن ەسكەرگەن ءجون دەيدى.

“كۇنكورىس دەڭگەيىن ساناعاندا ادامعا كۇن كورۋ ءۇشىن تەك تاماق پەن كيىم عانا كەرەك ەمەس. ونىڭ, ارينە, الەۋمەتتىك-مادەني قاجەتتىگى بار. سونداي ماسەلەلەردى دە ەسكەرىپ وتىرۋ قاجەت. ول ۇلكەن كىسىگە دە, ايەل ادامعا دا, بالاعا دا قاتىستى. وسىنى ەسەپكە قوسۋ كەرەك. بالا-شاعاسى بولسا, ازاماتتاردىڭ تاماعى بار, كيەتىن كيىمى بار, كوممۋنالدىق تولەمدەر بار دەگەن سياقتى. ال 85 مىڭعا كۇن كورۋ مۇمكىن ەمەس. بۇل – ەڭ تومەنگى جالاقى. ال ەڭ تومەنگى كۇن كورۋ دەڭگەيى 48 مىڭ. ەندى جوقتان بار دەگەنى ۇكىمەتتىڭ”, – دەدى ەكونوميست مەرۋەرت ماحمۇتوۆا.

ايتا كەتەيىك, بىلتىر مەديانالىق تابىس جان باسىنا شاققاندا جەتپىس ءۇش مىڭ تەڭگە بولعان. ال ەڭ تومەنگى كۇنكورىس دەڭگەيى 2024 جىلدىڭ ماۋسىمىندا 49 168 تەڭگە بولدى. ساراپشىلار ەڭ تومەنگى كۇنكورىس دەڭگەيىن جاڭاشا ەسەپتەۋ كەدەيشىلىكپەن كۇرەسۋگە سەپ بولادى دەيدى.