Elde endi eń tómengi kúnkóris deńgeıi jańa tártippen eseptelmek

Foto: ashyq derekkóz

Eńbek jáne halyqty áleýmettik qorǵaý mınıstrligi eldegi kúnkóris deńgeıin medıanalyq tabys deńgeıi arqyly anyqtaýdy josparlap otyr. Sáıkesinshe ortasha jalaqy arqyly esepteledi. Nátıjesinde elde belgilengen kedeılik shegi ósýi múmkin. Bul týraly Stan.kz aqparat agenttigi 31-arnanyń “Informbıýro” baǵdarlamasyna silteme jasap habarlaıdy.

Resmı statıstıkaǵa súıensek, elde belgilengen kedeılik shegi halyqaralyq standarttardan aıtarlyqtaı tómen. Sondyqtan úkimet jańa júıege kóshpek.

“Osy medıanalyq tabysqa kóshkenimen, mınıstrlik medıanalyq tabystyń qandaı bóligi esepteletinin aıtqan joq. Degenmen buǵan ótken kezde kedeılik sheginiń mólsheri ulǵaıatyny anyq jáne de áleýmettik járdemaqymen qamtamasyz etiletinderdiń sany artady”, – dedi sarapshy Sanjar Qaldarov.

Al ekonomıster eń tómengi jalaqydan da az aılyq alatyn jandardyń da za emesin aıtady. Máselen, byltyr olardyń sany bir mıllıonnan asqan. Sondyqtan kúnkóris deńgeıin eseptegende halyqtyń basqa da qajetin eskergen jón deıdi.

“Kúnkóris deńgeıin sanaǵanda adamǵa kún kórý úshin tek tamaq pen kıim ǵana kerek emes. Onyń, árıne, áleýmettik-mádenı qajettigi bar. Sondaı máselelerdi de eskerip otyrý qajet. Ol úlken kisige de, áıel adamǵa da, balaǵa da qatysty. Osyny esepke qosý kerek. Bala-shaǵasy bolsa, azamattardyń tamaǵy bar, kıetin kıimi bar, kommýnaldyq tólemder bar degen sııaqty. Al 85 myńǵa kún kórý múmkin emes. Bul – eń tómengi jalaqy. Al eń tómengi kún kórý deńgeıi 48 myń. Endi joqtan bar degeni úkimettiń”, – dedi ekonomıst Merýert Mahmutova.

Aıta keteıik, byltyr medıanalyq tabys jan basyna shaqqanda jetpis úsh myń teńge bolǵan. Al eń tómengi kúnkóris deńgeıi 2024 jyldyń maýsymynda 49 168 teńge boldy. Sarapshylar eń tómengi kúnkóris deńgeıin jańasha esepteý kedeıshilikpen kúresýge sep bolady deıdi.