ەلدە سۋ تاسقىنى باستالعالى 99 مىڭنان استام ادام ەۆاكۋاتسيالاندى

ەلدە سۋ تاسقىنى باستالعالى 99 مىڭنان استام ادام قاۋىپسىز جەرگە كوشىرىلگەن. ولاردىڭ 36 مىڭنان استامى بالا. ال ۋاقىتشا قونىستاندىرۋ پۋنكتەرىن 6516 ادام پانالاپ وتىر. بۇل تۋرالى رەسپۋبليكالىق اقپاراتتىق شتابتىڭ بريفينگىندە ايتىلدى. توتەنشە جاعدايلار مينيسترلىگىنىڭ مالىمەتىنشە, 3513 جەكە تۇرعىن ءۇي سۋ استىندا قالدى. بۇگىنگە دەيىن جەدەل جەلى بايلانىسىنا 1348 قوڭىراۋ كەلىپ تۇسكەن. زارداپ شەككەن ايماقتارعا 1 مىڭ توننا گۋمانيتارلىق كومەك جەتكىزىلدى. ەراسىل سايپاش قر تجم ازاماتتىق قورعانىس جانە اسكەري بولىمدەر كوميتەتىنىڭ اعا وفيتسەرى: — تجم جانە جەرگىلىكتى اتقارۋشى ورگانداردىڭ كۇشتەرىمەن 8,9 ملن. جۋىق تەكشە مەتر ەرىگەن قار سۋى سورىلدى, 1,6 ملن. قاپشىق جانە 1,2 ملن. توننا ينەرتتى ماتەريال توسەلدى. سۋ جۇرگەن 110 اۆتوجول, سۋ شايعان 116 اۆتوجول, ونىڭ ىشىندە 9 كوپىر جانە 107 جول توسەمى باقىلاۋدا.