“ەلدەن قاشپاق بولعان”. ۇلتارازدىق تۋدىرعان اليكا مۋحاماديەۆا 2 ايعا قاماۋعا الىندى

الەۋمەتتىك جەلىدە ۇلتارازدىق الاۋىزدىق تۋدىرىپ, قازاقتاردىڭ ار-نامىسىنا تيەتىن جازبا قالدىرعان قاراعاندى تۇرعىنى اليكا مۋحاماديەۆا 2 ايعا قاماۋعا الىندى, دەپ جازادى  qandastar.kz  Alash.kz ۇلتتىق پورتالىنا سىلتەمە جاساپ.

قاراعاندى وبلىستىق پوليتسيا دەپارتامەنتىنىڭ حابارلاۋىنشا, الەۋمەتتىك جەلىلەردى باقىلاۋ بارىسىندا الەۋمەتتىك جەلى قولدانۋشىسى تاراپىنان ۇلتارالىق ارازدىقتى قوزدىرۋ فاكتىسى انىقتالدى.

“اتالعان فاكتى بويىنشا قىلمىستىق كودەكستىڭ 174-بابىنىڭ 1-بولىگىمەن قىلمىستىق ءىس تىركەلىپ, كۇدىكتى ۋاقىتشا ۇستاۋ يزولياتورىنا قامالدى.

تەرگەۋ بارىسىندا قاراعاندى قالاسىنىڭ 22 جاستاعى تۇرعىنى «Theads» الەۋمەتتىك جەلىسىندە ۇلتارالىق ارازدىق بەلگىلەرى بار جازبا جاريالاعانى انىقتالدى. تەرگەۋ ورگاندارىنا كۇدىكتىنىڭ ەلدەن كەتۋ نيەتى بەلگىلى بولعاندىقتان, وعان قاتىستى بۇلتارتپاۋ شاراسىن قاماۋدا ۇستاۋ تۇرىندە سانكتسيالاۋ تۋرالى ءوتىنىشحات بەرىلدى.

2025 جىلعى 22 شىلدەدە قاراعاندى قالاسىنىڭ تەرگەۋ سوتى اتالعان ءوتىنىشتى قاناعاتتاندىرىپ, تەرگەۋ مەرزىمى ىشىندە ەكى ايعا قاماۋعا الۋ تۇرىندەگى بۇلتارتپاۋ شاراسى سانكتسيالاندى.

قىلمىستىق ءىس بويىنشا سوتقا دەيىنگى تەرگەۋ جالعاسۋدا, قاجەتتى ساراپتامالار تاعايىندالدى. تەرگەۋ ناتيجەسى بويىنشا زاڭعا سايكەس پروتسەسسۋالدىق شەشىم قابىلداناتىن بولادى”,- دەلىنگەن رەسمي حابارلامادا.

ەستەرىڭىزگە سالا كەتەيىك, اليكا مۋحامەديەۆا ءوزىنىڭ Threads پاراقشاسىندا جاريالاعان جازبادا «قازاقستان نەمەن تانىمال?» دەگەن ساۋالعا «مامبەتامي» دەپ جاۋاپ بەرىپ, قازاق تىلىندە سويلەۋدى تالاپ ەتەتىندەردى مازاق ەتىپ, مەملەكەتتىك ءتىلدى «پولۋكالبيتسكي ديالوگ» دەپ كەلەمەجدەگەن.