«ەلدىڭ اقشاسى قايدا?» تانىمال جۋرناليست ءىلياس ساريەۆكە قاتىستى تاعى ءبىر دەرەكتى ايتتى

فوتو:Dalanews.kz

جۋىردا تانىمال قايىرىمدىلىق قوردىڭ جەتەكشىسى ءىلياس ساريەۆ ۇستالعانى تۋرالى اقپارات تارادى. جۋرناليست رۋسلان وتەپباي جاڭا دەرەكتى ءبولىستى, — دەپ حابارلايدى  qandastar.kz     Dalanews.kz-كە سىلتەمە جاساپ.

وسى ىستە اقتوتى ەسىمدى تاعى ءبىر ادام اتالدى.

«كۇدىكتى اقتوتى دۇيسەەۆاعا قاتىستى 2 (ەكى) اي مەرزىمگە كۇزەتپەن ۇستاۋ تۇرىندەگى بۇلتارتپاۋ شاراسىنا سانكتسيا بەرىلدى.  ول دەگەنىمىز اقتوتى تەرگەۋ امالدارى كەزىندە بوستاندىقتا شالقىپ جۇرمەيدى, سوتتى «سيزو»-دا كۇتەدى دەگەن ءسوز. ەلدىڭ اقشاسى قايدا? مۇنى قۇزىرلى ورگان انىقتايدى دەپ ويلايمىن…  3 ايدان بەرى ءجىتى نازارىمدا بولعان ءىلياس پەن اقتوتىنىڭ ءىسى تاياۋ كۇندەرى سوتقا جولدانادى», — دەدى جۋرناليست.

بلوگەر نەلىكتەن ۇستالدى?

«ەلگە كومەك بەر» قايىرىمدىلىق قورىنىڭ جەتەكشىسى ءىلياس ساريەۆ ۇستالعانىن العاشىندا زاڭگەر نۇرسۇلتان ورىنبەكوۆ مالىمدەدى. ونىڭ سوزىنشە, جۇرتتان ساريەۆتىڭ ۇستىنە ارىز تۇسكەن.

«قازاق روبين گۋد ءىلياس ساريەۆ الاياقتىق بابى بويىنشا ۇستالدى. الماتىدان وسىنداي حابار كەلدى. بىرنەشە ادامنان الاياقتىق ارەكەتى بويىنشا ارىز تۇسكەن ەدى. قازىر سول بويىنشا ۇستالعانى بەلگىلى بولدى. الدانعاندار بولسا, الماتى ءىىد-نە ارىزدانساڭىزدار بولادى», — دەدى ول.

ارتىنشا Dalanews.kz الماتى پوليتسيا دەپارتامەنتىنە ساۋال جولداپ, رەسمي اقپارات تا الدى.

«المالى اۋداندىق پب-نا قاراستى پوليتسيا ءبولىمى الاياقتىق دەرەگى بويىنشا قىلمىستىق ءىس قوزعادى. جان-جاقتى جانە وبەكتيۆتى تەرگەۋگە باعىتتالعان تەرگەۋ شارالارى جۇرگىزىلىپ جاتىر. ولاردىڭ قورىتىندىسى بويىنشا پروتسەسسۋالدىق شەشىم قابىلدانادى», — دەپ جازىلعان الماتى پوليتسيا دەپارتامەنتىنىڭ بۇعان دەيىنگى جاۋابىندا.