الەم جاڭالىقتارىجاڭالىقتار
ەلدوس مەنىڭ كيمونومدى كيىپ شىعىپ, چەمپيون اتاندى – ناوحيسا تاكاتو
فوتو: تاكاتونىڭ جەكە مۇراعاتىنان
فرانتسيادا ءوتىپ جاتقان وليمپيادا ويىندارىنىڭ فينالىندا ەلدوس سمەتوۆ تاتاميگە جاپونيانىڭ داڭقتى دزيۋدوشىسى ناوحيسا تاكاتونىڭ كيمونوسىن كيىپ شىققان. بۇل تۋرالى Kazinform تىلشىسىنە سپورتشىنىڭ ءوزى ايتىپ بەردى.
مەن ەلدوستى جەڭىسىمەن قۇتتىقتايمىن! ول فينالدا مەن سىيلاعان كيمونونى كيىپ شىعىپ, چەمپيون اتاندى. قازاق ەلى, العاشقى التىن جۇلدە قۇتتى بولسىن! ءبىز ەلدوس ەكەۋمىز تاتاميدە قارسىلاس بولساق تا ومىردە دوسپىز. وعان دەگەن قۇرمەتىم ەرەك. ونىڭ قازاقستاننىڭ ەڭ تانىمال سپورتشىلارىنىڭ ءبىرى ەكەنىن بىلەمىن. ەلدوس – مىقتى سپورتشى. پاريج وليمپياداسىندا قازاقستان قورجىنى جۇلدەگە تولا بەرسىن, – دەدى داڭىقتى جاپونيالىق سپورتشى.
ايتا كەتسەك, ەلدوس سمەتوۆ پەن ناوحيسا تاكاتو ريو جانە توكيو وليمپياداسىندا جەڭىس تۇعىرىنان بىرگە كورىنگەن. وتانداسمىز 2016 جىلى ريودا كۇمىس جۇلدەگەر اتانسا, جاپونيالىق دزيۋدوشى قولا جۇلدەگە قول جەتكىزگەن. ال توكيودا تاكاتو چەمپيون بولسا, ەلدوس قولا مەدالعا يەلىك ەتتى. مىنە, بيىل ەلدوس چەمپيون اتاندى. الايدا تاكاتو بيىل پاريج وليمپياداسىندا ونەر كورسەتكەن جوق. ول توكيو وليمپياداسىنان سوڭ مانسابىن اياقتادى.
