جاڭالىقتار
ەلدوس سمەتوۆ وتباسىمەن لوندونعا كوشتى
فوتو: instagram.com/yeldos60kg
پاريج وليمپياداسىنىڭ التىن جۇلدەگەرى ەلدوس سمەتوۆ ايەلىمەن بىرگە بىرنەشە اي لوندوندا ءومىر سۇرەدى, دەپ جازدى qandastar.kz
سپورتشى بۇل تۋرالى بىلتىر قاراشادا ايتقان. ول وليمپيادا ويىندارى كەزىندە اعىلشىن ءتىلىن بىلمەگەندىكتەن, قينالعانىن جەتكىزىپ, الداعى ماقساتىنىڭ ءبىرى – ءتىلدى جەتىك مەڭگەرۋ بولاتىنىن ايتقان بولاتىن.
«2025 جىلدىڭ باسىندا ارنايى اعىلشىن ءتىلىن ۇيرەنۋ ءۇشىن لوندونعا 4 ايعا بارامىن. حالىقارالىق دزيۋدو فەدەراتسياسىنا (IJF) اعىلشىن تىلىندە سۇحبات بەرگىم كەلەدى», – دەگەن ەدى سپورتشى جۋرناليستەرگە.
ەندى كۇنى كەشە سپورتشى الەۋمەتتىك جەلىدەگى پاراقشاسىندا لوندونعا جولعا شىققانى تۋرالى سۋرەتتەر جۇكتەدى. ونى جانە ايەلىن جاقىن دوستارى شىعارىپ سالعان.
«جول بولسىن! اماندىقتا جۇزدەسكەنشە! ەلدوس باۋىرىمىزدى انگلياعا شىعارىپ سالدىق. ساپارلارىڭ ءساتتى بولسىن!», – دەپ جازعان سپورتشىنىڭ جاقىندارى.
