ەلدوس سمەتوۆكە استانادان ءۇش بولمەلى پاتەر بەرىلدى

فوتو: اشىق دەرەككوز

ەلدوس سمەتوۆ بۇل تۋرالى ءوزىنىڭ الەۋمەتتىك پاراقشاسىندا ءبولىستى, دەپ حابارلايدى  qandastar.kz.

«قۇرمەتتى قازاق ەلى. بۇگىنگى تاڭدا قر دزيۋدو فەدەراتسياسىنىڭ پرەزيدەنتى قۋانىشبەك اعامىز وليمپيادادان العان جۇلدەمىز ءۇشىن ماراپاتتاپ, ءوزىنىڭ قۇرمەتىن كورسەتتى. جەكە باسىمنان قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەەۆ مىرزاعا جەكە العىسىمدى بىلدىرەمىن. وسى وليمپيادا ويىندارىنا بارعاندا ماعان ۇلكەن سەنىم ارتقان, مەنىڭ قانداي دا ءبىر ناتيجە كورسەتۋىمە جاۋاپكەرشىلىكتى ءوزىنىڭ موينىنا العان, ۇنەمى قولداۋ كورسەتىپ, بىرگە جۇمىس ىستەگەن جەكە باپكەرىم عالىمجان جىلگەلديەۆكە ءوزىمنىڭ راقمەتىمدى ايتقىم كەلەدى. وسى ۋاقىتقا دەيىن مەنى قولداپ جۇرگەن قر تۋريزم جانە سپورت مينيسترلىگىنە العىسىمدى بىلدىرگىم كەلەدى. سونىمەن قاتار, مينيسترلىكتىڭ باسشىسى ەربول قۋانتاي ۇلى اعامىزدى جاڭا قىزمەتىمەن شىن جۇرەكتەن قۇتتىقتايمىن. وسى جولدا ماعان كورسەتكەن قولداۋلارىڭىز ءۇشىن ەرەكشە العىس! الداعى ۋاقىتتا جەتىستىكتەرىمىز مول, جەڭىستى كۇندەرىمىز كوپ بولادى دەپ سەنەمىن. مەملەكەتىمىزدىڭ كوك بايراعى جەلبىرەپ, ەلىمىز امان, جۇرتىمىز تىنىش بولسىن», – دەپ جازدى ەلدوس سمەتوۆ.

ايتا كەتەيىك, ەلدوس سمەتوۆ –  پاريج وليمپياداسىنىڭ جالعىز التىن مەدال يەگەرى.