«ەلدوستى جاتتىقتىرۋعا قارسى ادامدار بولدى»: سمەتوۆتىڭ باپكەرى ءبىراز قۇپيانىڭ بەتىن اشتى

فوتو: اشىق دەرەككوز

كۇنى كەشە پاريج وليمپياداسىندا قازاق ەلىنە التىن جۇلدە الىپ كەلگەن دزيۋدوشى ەلدوس سمەتوۆتىڭ جەكە باپكەرى عالىمجان جىلگەلديەۆ «سپورت ءمينيسترى» YouTube كانالىنا سۇحبات بەردى, دەپ حابارلايدى Skifnews.kz اقپارات پورتالى.

باپكەر ەلدوستىڭ جەڭىس جولى, اسىرەسە, وعان جاسالعان كەدەرگىلەر مەن قولداۋلار تۋرالى ايتا كەلىپ, ۇلتتىق قۇراماداعى فرانتسۋز ماماندارىنىڭ جۇمىسىنا توقتالدى, دەپ جازادى sadaqmedia.kz.

«ەكى جىل بۇرىن فەدەراتسيا بىزگە فرانتسيادان مامانداردى الىپ كەلدى. مەن ارنايى بارىپ جاتتىعۋ بارىسىن كوردىم. بىراق, مەنىڭ باعدارلاماما كەلىڭكىرەمەيتىنىن بايقادىم. سوسىن ەلدوسقا «فرانتسۋزداردىڭ جۇمىسى ۇناسا, سولارمەن جەڭىسكە جەتەمىن دەسەڭ, مەنىڭ قارسىلىعىم جوق, دايىندال», دەدىم. بىراق ەلدوس: «اعا, مەن سىزبەن دايىندالامىن. ءسىزدىڭ پروگرامماڭىزبەن قانشا جەڭىسكە جەتتىك, بۇل بەلەستى دە ەڭسەرەمىز», دەدى. الايدا ءبىزدىڭ ەلدوسپەن بىرگە جاتتىعۋىمىزعا قارسى ادامدار كوپ بولدى», دەيدى باپكەر.

وسىنداي قىسىلتاياڭ شاقتا اراعا قر مسم سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆ تۇسەدى. «ەربول قۋانتاي ۇلىنا قۇرمەتىم ەرەكشە. مەن بۇل كىسىنى سىرتتاي بىلگەنىم بولماسا, بىرگە جۇرگەن ەمەسپىن, جاقىن تانىمايمىن دا. الدىمىزداعى كەدەرگىلەردى الىپ تاستادى.

«عالىمجان, سىزگە نە كەرەك, قانداي كومەگىم قاجەت» دەپ ءجۇرىپ, ەلدوستى بولەك شىعارىپ, وزىمە بەردى. «اعا, سىزگە سەنەمىز, ەلدوستان چەمپيون شىعارىڭىز», دەدى. مەن وعان «ماعان سەنىم ارتساڭىز, بار كۇشىمدى سالامىن, سەنىمدى اقتايمىن», دەدىم», — دەيدى ول.

بۇدان بولەك سمەتوۆتىڭ باپكەرى شاكىرتىنىڭ مىنەزى تۋرالى دا ايتا ءوتتى.

«ەلدوستا قانشاما جاراقاتتار بولدى. مەن وعان: «ەلدوس, ەشتەڭە ەتپەيدى, دەمال», — دەپ ءاردايىم ايتىپ وتىرامىن. سونداي-اق ءبىز ميمەن كوبىرەك جۇمىس ىستەدىك, پسيحولوگيالىق تۇرعىدان دايىندالدىق. ەلدوسقا ۇنەمى تەك باعىت-باعدار بەرە الاتىنىمدى, كەڭەس ايتا الاتىنمدى جەتكىزدىم, ال كۇرەسكەن كەزدە سەن ءوزىڭنىڭ ميىڭدى قوسىپ كۇرەسەسىڭ دەيتىنمىن. مەن ونىڭ ىشكى جاي-كۇيىن ءاردايىم وياتاتىنمىن. ول كىشكەنتايىنان ءوزى ىزاقور ەدى. مەن ونى ادەيى ىزالاندىراتىنمىن. مەن ونىڭ ىزاقور ەكەنىن بىلەمىن, ول مەنىڭ كوز الدىمدا ءوستى. ادامنىڭ بويىندا ول قاسيەت ءومىر-باقي قالىپ قالادى ەكەن. مەن ونىڭ ىشىندەگى وسى قاسيەتتى وياتسام, سوندا عانا كۇرەسەدى. سوندىقتان وسىنداي مىنەز بولۋى كەرەك», — دەدى عالىمجان جىلگەلديەۆ.

عالىمجان جىلگەلديەۆ ەلدوستىڭ ەندىگى جولى قالاي باعىتتالارىنا قاتىستى ويىن جەتكىزدى.

«مەنىڭ ويىمشا, ەلدوس سپورتتا ءجۇرۋى كەرەك, الىستاماۋى كەرەك. سوڭىنان ەرگەن جاستارعا بىلگەنىن ۇيرەتۋى كەرەك», — دەيدى  جىلگەلديەۆ.