جاڭالىقتار
ەلەنا رىباكينا «ۋيمبلدون-2025» ءتۋرنيرىنىڭ ەكىنشى اينالىمىنا شىقتى
الەمنىڭ 11-راكەتكاسى ەلەنا رىباكينا لوندوندا ( ۇلىبريتانيا) ءوتىپ جاتقان «ۋيمبلدون-2025» ءتۋرنيرىن ءىرى جەڭىسپەن باستادى, دەپ حابارلايدى Qandastar.kz.
العاشقى ماتچتا ول الەمدىك رەيتينگتە 49-ورىندا تۇرعان ارمەنيالىق ەلينا اۆانەسياندى 6:2, 6:1 ەسەبىمەن سەنىمدى جەڭدى.
ماتچ 1 ساعاتقا سوزىلدى. وسى ۋاقىت ىشىندە رىباكينا ءۇش ەيس جاساپ, ءبىر قوس قاتە جىبەردى جانە التى برەيك-پوينتتىڭ بەسەۋىن ءساتتى پايدالاندى.
ەكىنشى اينالىمدا رىباكينا گرەكيا وكىلى ماريا ساككاريمەن كەزدەسەدى.
ايتا كەتەيىك, ءتۋرنيردىڭ جەكەلەي جارىس كەستەسىندە قازاقستان اتىنان تەك ەلەنا رىباكينا عانا قالدى. الەكساندر بۋبليك, الەكساندر شەۆچەنكو, بەيبىت جۇقاەۆ جانە يۋليا پۋتينتسەۆا ءبىرىنشى اينالىمنان اسا المادى.
