«ەلگە كومەك» قايىرىمدىلىق قورىنىڭ جەتەكشىسى قاماۋعا الىندى

فوتو: سكرين

جەلىدە qazaq_robin_hood لاقاپ اتىمەن تانىلعان «ەلگە كومەك» قايىرىمدىلىق قورىنىڭ جەتەكشىسى ءىلياس ساريەۆ قاماۋعا الىندى. بۇل تۋرالى زاڭگەر نۇرسۇلتان ورىنبەكوۆ الەۋمەتتىك جەلىدەگى پاراقشاسىندا جازدى, دەپ حابارلادى qandastar.kz سايتى Orda.kz-كە سىلتەمە جاساپ.

«قازاق روبين گۋد — ءىلياس ساريەۆ الاياقتىق بابى بويىنشا ۇستالدى», — دەپ حابارلادى ول.

الماتى قالالىق پوليتسيا دەپارتامەنتى اتالعان اقپاراتتى راستادى. قازىرگى ۋاقىتتا قىلمىستىق ءىس قوزعالىپ, تەرگەۋ امالدارى جۇرگىزىلىپ جاتىر.

«المالى اۋداندىق پوليتسيا باسقارماسىنا قاراستى بولىمدە الاياقتىق دەرەگى بويىنشا قىلمىستىق ءىس قوزعالدى. جان-جاقتى ءارى وبەكتيۆتى تەرگەۋگە باعىتتالعان بىرقاتار تەرگەۋ شارالارى جۇرگىزىلۋدە. ناتيجەسىندە پروتسەسسۋالدىق شەشىم قابىلدانادى»,  — دەپ حابارلادى الماتى پوليتسيا دەپارتامەنتى.

ايتا كەتەيىك, بۇعان دەيىن «ەلگە كومەك» قايىرىمدىلىق قورى داۋعا ىلىككەن بولاتىن. الەۋمەتتىك جەلىدە قور قارجىنى ماقساتسىز جۇمساعانى تۋرالى اقپارات تارادى. ءتىپتى جۋرناليست گۇلميرا ابىقايعا بىرنەشە ادام حابارلاسىپ, الدانىپ قالعاندارىن ايتقان. قور الەۋمەتتىك جەلىدە «ءۇي الىپ بەردىك» دەپ ەسەپ بەرگەنىمەن, شىن مانىندە ول ءۇي يەسىنە بەرىلمەگەنى ايتىلدى. الايدا قور جەتەكشىسى ءىلياس ساريەۆ بۇل اقپاراتتىڭ بارلىعىن جوققا شىعارعان ەدى.