ەلىمىزدە 2025-2027 جىلدارى جىل سايىن ۇلتتىق قوردان 2 تريلليون تەڭگە الىنباق

فوتو: اشىق دەرەككوز

30 قازاندا ءماجىلىس وتىرىسىندا «قازاقستان رەسپۋبليكاسىنىڭ ۇلتتىق قورىنان 2025-2027 جىلدارعا ارنالعان كەپىلدەندىرىلگەن ترانسفەرت تۋرالى» زاڭ جوباسى قارالدى. بۇل تۋرالى qandastar.kz Stan.kz اقپارات اگەنتتىگىنە سىلتەمە جاساپ حابارلايدى.

ۇلتتىق ەكونوميكا ءمينيسترى نۇرلان بايبازاروۆتىڭ ايتۋىنشا, كەپىلدەندىرىلگەن ترانسفەرتتىڭ مولشەرى بيۋدجەتتىك قاعيدالارعا سايكەس انىقتالعان.

“زاڭ جوباسىندا مۇنايدىڭ كەسىمدى باعاسى 2025 جىلى باررەلىنە 42,3 اقش دوللارى, 2026-2027 جىلدارى باررەلىنە 41-39,4 اقش دوللارى دەڭگەيىندە بەلگىلەنگەن. وسىنى ەسكەرە وتىرىپ, ۇلتتىق قوردان كەپىلدەندىرىلگەن ترانسفەرتتىڭ مولشەرى 2025-2027 جىلدارعا جىل سايىن 2 ترلن تەڭگە كولەمىندە ايقىندالدى”, – دەدى ول ءوز بايانداماسىندا.

اتالعان كەزەڭدە ۇلتتىق قوردىڭ تازا ۆاليۋتالىق اكتيۆتەرى 2025 جىلى 62,2 ميلليارد دوللار, 2026-2027 جىلدارى 69,9 جانە 78,7 ميلليارد دوللار بولادى دەپ بولجانعان.