ەلىمىزدە 25 مىڭ قىزمەتكەردىڭ جالاقىسى وسەدى

فوتو: سۋ رەسۋرستارى جانە يرريگاتسيا مينيسترلىگى

جىل باسىنان بەرى «قازسۋشاردىڭ» 279 ماۋسىمدىق جۇمىسشىسى تۇراقتى جۇمىسپەن قامتىلدى, دەپ حابارلادى Qandastar.kz اقپارات پورتالى. 

جاقىن ارادا تاعى 146 ادام تۇراقتى جۇمىسقا قابىلدانادى. وسىلايشا, كاسىپورىنداعى 425 ماۋسىمدىق جۇمىسشىنىڭ بارلىعى تۇراقتى جۇمىسپەن قامتىلادى.

سونىمەن قاتار بۇل جۇمىسشىلارعا جاڭا مىندەتتەر جۇكتەلەدى. ولار كانالدار مەن گيدروتەحنيكالىق قۇرىلعىلاردى جوندەۋگە قاتىسادى, سۋ پايدالانۋشىلارمەن جۇمىس ىستەيدى, سۋ تاسقىنى مەن توتەنشە جاعدايلار كەزىندە كەزەكشىلىك اتقارادى, سونداي-اق گيدروتەحنيكالىق نىسانداردى كونسەرۆاتسيالاۋمەن اينالىسادى.

«بۇرىن ماۋسىمدىق جۇمىسشىلار جىلىنا 6-8 اي عانا جۇمىس ىستەيتىن. ەندى بارلىعى تۇراقتى جۇمىسپەن قامتىلادى. مينيسترلىك سۋ شارۋاشىلىعى ماماندارىنىڭ ەڭبەك جاعدايىن جاقسارتۋ شارالارىن قابىلداپ جاتىر. جاڭا تەحنيكا ساتىپ الىنۋدا, ال قىركۇيەك ايىندا «تابيعي مونوپوليالار تۋرالى» زاڭعا وزگەرىستەر كۇشىنە ەنەدى. وسى وزگەرىستەرگە سايكەس, سۋ سالاسىنداعى 25 000 قىزمەتكەردىڭ جالاقىسى ورتا ەسەپپەن 35-50% وسەدى», – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.