ەلىمىزدە اگرەسسورلارمەن جۇمىس كۇشەيەدى

ەلىمىزدە تۇرمىستىق زورلىق-زومبىلىققا قاتىستى, جاڭا زاڭعا سايكەس اگرەسسورلارمەن جۇمىس كۇشەيەدى

ەندى ولارعا الكوگولدى ىشىمدىكتى تۇتىنۋعا تىيىم سالىنادى. جانجالعا بەيىم جاندار پسيحولوگيالىق كومەك الىپ, ءماجبۇرلى تۇردە ەمدەلەدى. ەلدە اگرەسسورلارمەن جۇمىستى العاش بولىپ باستاعانداردىڭ ءبىرى – «وتباسىلىق تابىس ورتالىعى» قوعامدىق قورى. ونداعى ماماندار حالىقارالىق ستاندارتقا سايكەس ءبىلىم الىپ, قازىر ىشكى ىستەر ورگاندارىمەن جۇمىس ىستەپ ءجۇر.

قور ديرەكتورىنىڭ ايتۋىنشا, جانۇيادا جانجال شىعاراتىنداردىڭ باسىم بولىگى – پسيحولوگيالىق كومەككە مۇقتاج ازاماتتار. روزا بەكىشەۆا, «وتباسىلىق تابىس ورتالىعى» قوعامدىق قورىنىڭ ديرەكتورى — ءبىز قازىر 60 اگرەسسورمەن جۇمىس ىستەپ جاتىرمىز. بۇگىندە ولاردىڭ 18-ءى ءوز ەركىمەن مامانداردىڭ كومەگىنە جۇگىنىپ, ۇنەمى كەڭەس الىپ وتىرادى. وتباسىن ساقتاپ قالۋدىڭ امالدارىن جاساپ ءجۇر. ال قالعاندارى ءوز پسيحولوگيالىق جاعدايىن تۇسىنگىسى كەلمەيدى. وتكەن جىلى ەلدىڭ 5 وڭىرىندە اگرەسسورلارمەن جۇمىستى قامتيتىن پيلوتتىق جوبا ىسكە قوسىلدى.

ونىڭ اياسىندا اربىرىنە جەكە باعدارلاما قاراستىرىلعان. ولارعا ءتيىستى كومەك بەرۋ ماقساتىندا 300-گە جۋىق مامان ارنايى ءبىلىم الدى. نايلا مۇحتاروۆا, قر مادەنيەت جانە اقپارات مينيسترلىگى جاستار جانە وتباسى ىستەرى كوميتەتى توراعاسىنىڭ ورىنباسارى: — ارنايى ادىستەمە ازىرلەپ, ەلدىڭ 5 وڭىرىندە پسيحولوگتارمەن جۇمىستار اتقاردىق. سونىمەن قاتار داعدارىس ورتالىقتارىنىڭ قىزمەتكەرلەرىن وقىتىپ, بىلىكتىلىگىن ارتتىردىق. ۋچاسكەلىك پوليتسيا مەن پوليتسيادا جۇمىس ىستەپ جاتقان ايەلدەر قۇقىعىن قورعاۋ ءبولىمىنىڭ قىزمەتكەرلەرىنىڭ بىلىكتىلىگىن ارتتىردىق. اگرەسسورلارمەن جۇمىس زاڭ اياسىندا بەكىتىلگەن. قابىلدانعان زاڭ اياسىندا ەندى اگرەسسورلار مەديتسينالىق ۇيىمدارعا ءماجبۇرلى تۇردە ەمدەۋگە جىبەرىلەدى.

سونداي-اق ولارعا جابىرلەنۋشىمەن بايلانىسۋعا, ۇيالى تەلەفون ارقىلى پسيحولوگيالىق قىسىم كورسەتۋگە جانە  الكوگولدى ىشىمدىك پەن ەسىرتكى تۇتىنۋعا تىيىم سالىنادى. قانات قورجىنباەۆ, ۋچاسكەلىك پوليتسيا ينسپەكتورى: — كوبىنەسە اگرەسسورلاردىڭ اگرەسسيۆتى بولۋىنىڭ ءوزى كوپ نىسانعا بايلانىستى. ول دەگەنىمىز, الكوگوليزم, ناركومانيا, لۋدومانيا دەگەن بار, قاراجاتتىڭ جەتىسپەۋى. سوندىقتان ءبىز بىرگە جۇمىس ىستەيتىن قوعامدىق قورىنداعى پسيحولوگتاردى پوليتسيا بولىمىنە شاقىرامىز.

ول جەردە كىسىنىڭ نەگىزگى پروبلەماسىن انىقتايدى. وعان دۇرىس شەشىم, جول كورسەتەدى. سودان كوپ وزگەرىستەر بوپ جاتىر جاقسى جاعىنا قاراي. ىشكى ىستەر مينيسترلىگىنىڭ دەرەگىنشە, جىل باسىنان بەرى ەلىمىزدە تۇرمىستىق جانجالعا قاتىستى 15 مىڭنان استام قىلمىس تىركەلگەن. ستاتيستيكا كوڭىل كوشىتپەيدى. دەپۋتاتتار: «جاڭا زاڭدى ايەل مەن بالا قۇقىعىن قورعاپ قانا قويماي, اگرەسسورلاردىڭ سانىن پروفيلاكتيكا ارقىلى ازايتۋعا مۇمكىندىك بەرەدى», – دەپ وتىر. اسحات ايماعامبەتوۆ, قر پارلامەنتى ءماجىلىسىنىڭ دەپۋتاتى: — بىرىنشىدەن, بۇل زاڭدا كەشەندى ماسەلەلەر قاراستىرىلعان.

جاۋاپكەرشىلىكتى قاتاڭداتۋ عانا دەگەن جوق. ونىڭ الدىن الۋ, ءتيىستى كومەك كورسەتۋ, ءتيىستى ورتالىقتاردى قۇرۋ سياقتى پروفيلاكتيكالىق ماسەلەلەر قاراستىرىلعان.

بۇل نەگىزى وتە ماڭىزدى زاڭ بولىپ تابىلادى. بىزدە قۇقىقبۇزۋشىلىققا مۇلدە توزبەۋشىلىك قالىپتاستىرۋ ءۇشىن وتە ماڭىزدى. جىل باسىنان بەرى 34 مىڭعا جۋىق قاسكوي اكىمشىلىك جاۋاپكەرشىلىككە تارتىلدى. ال 27 مىڭنان استامىنا ايەلىمەن بايلانىسۋعا شەكتەۋ قويىلدى.