ەلىمىزدە ايەلدەر كاسىپكەرلىگىن دامىتۋ ماقساتىندا 20 ورتالىق اشىلدى

بۇگىن قىزىلوردادا «اناعا تاعزىم» رەسپۋبليكالىق انالار فورۋمى ءوتتى. ءىس-شاراعا قر پرەزيدەنتى جانىنداعى ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا, قوعام قايراتكەرلەرى, وڭىرلەردەن كەلگەن دەلەگاتسيالار, قىزىلوردا وبلىسىنىڭ كوپبالالى انالارى قاتىستى.

ۇلتتىق كوميسسيامەن بىرىگىپ ۇيىمداستىرىلعان فورۋمدا قىزىلوردا وبلىسى اكىمى نۇرلىبەك نالىباەۆ قاتىسۋشىلارعا ارناپ ءسوز سويلەدى. فورۋمنىڭ ماقساتى – ايەل مەن انانى قۇرمەتتەۋ, وسكەلەڭ ۇرپاقتى رۋحاني-ادامگەرشىلىك تاربيە بەرۋ, ىزگى قۇندىلىقتاردى قوعامدا ناسيحاتتاۋ.

ەگەمەن ەلىمىزدىڭ دامۋى مەن گۇلدەنۋىنە قىز-كەلىنشەكتەردىڭ دە ۇلەسى وتە زور. سوندىقتان ايەلدەردىڭ قوعامداعى ءرولىن, مۇمكىندىكتەرىن ارتتىرۋ – مەملەكەتتىك ساياساتتىڭ باسىم باعىتتارىنىڭ ءبىرى.

بۇل سالادا قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى ىسكە اسىرىلۋدا. وندا وتباسى ينستيتۋتى مەن گەندەرلىك تەڭدىكتى دامىتۋدىڭ قازاقستاندىق مودەلى ايقىندالعان. ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءوزىنىڭ تيىمدىلىگىن كورسەتتى. مەملەكەت باسشىسى بەلگىلەگەن باسىمدىقتارعا سايكەس, ونىڭ قىزمەتى ايەلدەر مەن بالالاردىڭ قۇقىعىن قورعاۋ سالاسىنداعى وزەكتى ماسەلەلەردىڭ اۋقىمىن پىسىقتاۋعا. گەندەرلىك تەڭدىكتى قامتاماسىز ەتۋدىڭ قۇقىقتىق جانە ينستيتۋتسيونالدىق نەگىزى قالىپتاستى. ايەلدەرگە قاتىستى كەمسىتۋشىلىكتى جويۋ جانە تەڭدىكتى ساقتاۋ بويىنشا زاڭنامالىق نورمالار جۇمىس ىستەيدى.

ۇلتتىق كوميسسيانىڭ باقىلاۋىندا ون شاقتى ماڭىزدى ماسەلە بار. ولاردىڭ قاتارىنا ايەلدەر اراسىنداعى جۇمىسسىزدىقتى ازايتۋ ماسەلەسى دە كىرەدى.

وسىعان بايلانىستى وڭىرلەردە ايەلدەر كاسىپكەرلىگىن دامىتۋ ماقساتىندا 20 ورتالىق اشىلدى. «TECHNOWOMEN» قاۋىمداستىعىمەن, «BTS Education» كومپانياسىمەن بىرلەسىپ, ەلەكتروندى كوممەرتسيا مەكتەبى اشىلدى, 1400 قازاقستاندىق قولونەرشىگە ماركەتپلەيستەردە ساتۋ ۇيرەتىلدى.

Astana Hub-پەن بىرلەسكەن «IT Ayel» جوباسى شەڭبەرىندە قازاقستاننىڭ 17 وڭىرىنەن 2000 جۇمىسسىز ايەل IT ماماندىقتارى بويىنشا ءبىلىم الىپ, العاشقى جوبالارىن جاسادى.

اباي, جەتىسۋ, ۇلىتاۋ وبلىستارىنداعى ايەلدەردىڭ الەۋمەتتىك جاعدايىن كەشەندى زەرتتەۋ ناتيجەلەرى بويىنشا اۋىل ايەلدەرىن جۇمىسقا تارتۋ بويىنشا ناقتى شارالار ازىرلەندى.

بۇۇ حالىق قورىمەن (يۋنفپا) بىرلەسىپ, استانا جانە شىمكەنت قالالارىندا نەكەگە دەيىنگى تەگىن كەڭەس بەرۋ جانە نەكەنى تىركەۋگە ءوتىنىش بەرگەن ازاماتتارعا وتباسىن جوسپارلاۋ مەن وتباسىلىق پسيحولوگيا, وتباسىلىق بيۋدجەتتى جوسپارلاۋ جانە باسقا دا ماڭىزدى ماسەلەلەر بويىنشا وقىتۋدىڭ پيلوتتىق جوباسى ىسكە قوسىلدى.

وڭىرلەردە جۇمىس ىستەيتىن 68 وتباسىن قولداۋ ورتالىقتارىنا ترانسفورماتسيالاۋ جۇرگىزىلۋدە. وتباسىن قولايسىز الەۋمەتتىك ورتادان شىعارۋدا, ايەلدەرگە قاتىستى زورلىق-زومبىلىقتىڭ الدىن الۋدا ۆەدومستۆوارالىق ءوزارا بايلانىس ورناتۋ ماقساتىندا وتباسىن قولداۋ ورتالىقتارى ءۇشىن بىرىڭعاي تۇجىرىمداما جوباسى ازىرلەندى.

ۇلتتىق كوميسسيا توراعاسى بارلىق باعىتتار بويىنشا جۇمىستار جالعاساتىنىن ەرەكشە اتاپ ءوتتى.

فورۋمعا قاتىسۋشىلار وسكەلەڭ ۇرپاقتى تاربيەلەۋ, وتباسى مارتەبەسىن كوتەرۋ, ادامگەرشىلىك-وتباسىلىق قۇندىلىقتاردى قالىپتاستىرۋدا وزەكتى ماسەلەلەردى تالقىلادى.
سونىمەن قاتار مينيستر قىزىلورداداعى «ونەر ورتالىعىنىڭ» اشىلۋىنا قاتىسىپ, «سىر ءوڭىرى ونەرى تۇلعالارىنىڭ ەكسپوزيتسيالىق كارتيناسى» كورمەسىمەن تانىستى.

مادەنيەت نىسانىنىڭ قۇرىلىسى قىزىلوردادا 2022 جىلدىڭ قىركۇيەگىندە باستالدى. مۇندا سيمفونيالىق, ەسترادالىق كونتسەرتتەردى, ءتۇرلى فورماتتاعى ءىس-شارالاردى وتكىزۋ ءۇشىن جاعداي جاسالعان.