ەلىمىزدە العاشقى اەس-ءتىڭ قۇنى قانشا بولۋى مۇمكىن?

فوتو: اشىق دەرەككوز

اتوم ەنەرگەتيكاسى جونىندەگى اگەنتتىك توراعاسى الماسادام ساتقاليەۆ العاشقى اەس-تىڭ قۇنى قانداي بولۋى مۇمكىن ەكەنىن ايتتى, دەپ حابارلايدى qandastar.kz

«قۇنى تەحنيكالىق-ەكونوميكالىق نەگىزدەمە نەگىزىندە بەلگىلى بولادى. بۇگىنگى تاڭدا بىزدە كونكۋرس راسىمدەرىنە قاتىسقان ۆەندورلار ۇسىنعان ينديكاتيۆتى پارامەترلەر بار. بىراق تا, قازىر بۇل مالىمەتتەردى جاريا ەتە المايمىز, سەبەبى بۇل پروتسەسكە قاتىسۋشىلارمەن جاسالعان قۇپيالىق تۋرالى كەلىسىمدەرمەن قورعالعان. جالپى الەمدىك تاجىريبەگە سۇيەنەر بولساق, وسىنداي دەڭگەيدەگى ستانتسيانىڭ قۇنى كەم دەگەندە شامامەن 14 ميلليارد دوللار تۇرادى», – دەدى الماسادام ساتقاليەۆ.

سونداي-اق, ول ەكىنشى اەس-ءتى قىتاي سالادى دەپ ايتىلعان اقپاراتقا تۇسىنىكتەمە بەردى.

— اەس سالۋمەن بايلانىستى ءاربىر جوبا وزىنشە بىرەگەي. ءبارىنىڭ قۇزىرەتى, بايىپتى تاجىريبەسى بار. «روساتومدى» ءبىرىنشى جوباعا تاڭداپ الۋىمىزدىڭ وزىنە قۇرىلىستىڭ مەرزىمى بويىنشا ۇسىنعان نۇسقاسىمەن بايلانىستى بولدى. قىتاي تارابىمەن كەلىسسوز وتكەننەن كەيىن عانا ەكىنشى اەس قۇرىلىسى تۋرالى ايتۋعا بولاتىن شىعار, — دەدى اگەنتتىك توراعاسى.