ەلىمىزدە اۋىل شارۋاشىلىعى ساناعى وتەدى

فوتو: gov.kz

ستراتەگيالىق جوسپارلاۋ جانە رەفورمالار اگەنتتىگى توراعاسىنىڭ ورىنباسارى ولجاس تولەۋوۆ ۇلتتىق اۋىل شارۋاشىلىعى ساناعىن وتكىزۋگە دايىندىق بارىسى جونىندە كەڭەس وتكىزدى, – دەپ حابارلايدى qandastar.kz

ساناقتىڭ باستى ماقساتى اۋىل شارۋاشىلىعىنىڭ ناقتى جاعدايى تۋرالى ەگجەي-تەگجەيلى اقپارات الۋ بولىپ تابىلادى. بۇل وسى سالاداعى الەۋمەتتىك-ەكونوميكالىق ساياساتتى ازىرلەۋ مەن ىسكە اسىرۋدىڭ تيىمدىلىگىن ارتتىرۋعا مۇمكىندىك بەرەدى.

ۇلتتىق ستاتيستيكا بيۋروسى باسشىسىنىڭ ورىنباسارى اسەل شاۋەنوۆانىڭ ايتۋىنشا, ساناق بۇكىل ەل بويىنشا 20 مىڭ اۋىلشارۋاشىلىق كاسىپورنىن, 300 مىڭ شارۋا جانە فەرمەر قوجالىعىن, سونداي-اق 1,9 ميلليوننان استام جەكە قوسالقى شارۋاشىلىقتى قامتيدى.

ساناقتىڭ نەگىزگى بولىمدەرى جەر رەسۋرستارى جانە ولاردى پايدالانۋ, مال شارۋاشىلىعى, بالىق شارۋاشىلىعى, تەحنيكالىق قۇرالدار, وندىرىستىك ءۇي-جايلار, اۋىل شارۋاشىلىعى ونىمدەرىن وتكىزۋ, ينفراقۇرىلىمنىڭ قولجەتىمدىلىگى, ەڭبەك رەسۋرستارى, شارۋاشىلىق جۇرگىزۋ شارتتارى, تسيفرلىق تەحنولوگيالاردى پايدالانۋ تۋرالى اقپاراتتى قامتيدى.

جۇمىس جوسپارى بويىنشا 1 تامىزدا sanaq.gov.kz سايتىندا ونلاين ساۋالناما باستالادى, ول 2025 جىلدىڭ 31 تامىزىنا دەيىن جالعاسادى. 20 قىركۇيەكتەن 20 قازانعا دەيىن ونلاين ساۋالنامادان وتپەگەن ادامدار ءۇشىن جەكە سۇحبات ارقىلى ساناق كەزەڭى وتكىزىلەدى.