ەلىمىزدە اۋىل شارۋاشىلىعى تەحنيكاسىنىڭ 76%-ءى ەسكىرگەن

ماشينا-تراكتور پاركىنىڭ 76%-ءى ەسكىرگەن. ال جەڭىلدىكپەن بەرىلەتىن ليزينگ بارلىعىنا بىردەي جەتپەيدى. بىلتىر جاڭا تەحنيكا الۋعا نيەت بىلدىرگەن 4000 ادامنىڭ ءوتىنىشى قاراۋسىز قالعان. اۋىل شارۋاشىلىعى تەحنيكاسىن جاڭعىرتۋ جۇمىستارىنىڭ باياۋ ءجۇرۋى سالانىڭ دا دامۋىن تەجەيدى.

قۋاندىق تاناباس, ءتىلشى: – ماقسات ءابدىراحمانوۆ شارۋا قوجالىعىن 2014 جىلى قۇردى. باستاپقىدا 6 گەكتار جەر يگەرگەن. قازىر 230 گەكتارعا سويا, قانت قىزىلشاسىن ەگەدى. 2018 جىلى العاش رەت ليزينگكە تراكتور الدى. سودان بەرى 10 تەحنيكانى مەملەكەت قولداۋىمەن جاڭارتتى. ماقسات ءابدىراحمانوۆ, شارۋا قوجالىعىنىڭ باسشىسى: – پالەنباي ميلليون تولەگەنشە كرەديت ارقىلى الام, 15%-ءىن تولەيمىن.

ونىڭ 25% سۋبسيدياسىن مەملەكەت قايتارىپ بەرەدى بىزگە. كادىمگىدەي كومەك قوي. ارتىق اقشاعا جەر الىپ, جۇمىسشىلاردىڭ اشقاسى بار دەگەندەي. ۇكىمەتتىڭ ارقاسىندا 10 تەحنيكا الىپ, سونىڭ ارقاسىندا ءوسىپ-ءونىپ جاتىرمىز. تەحنيكانىڭ ارقاسىندا عوي. مەملەكەت قولداۋىمەن كاسىپكەردىڭ شارۋاسى شيراپ, جۇمىسى العا باستى. سۋ جاڭا تەحنيكانىڭ ارقاسىندا ءونىم كولەمى دە ۇلعايدى دەيدى ديقاندار. ولجاس مۇحامەدسادىقوۆ, شارۋا قوجالىعىنىڭ جۇمىسشىسى: – ويلانباي, قينالماي تارتادى. 11 ساعاتتا 20 گا جەر ايدالدى. تاماشا, كونديتسيونەر, نانوتەحنولوگيا عوي پوچتي.

ەكى «بەلارۋستىڭ» جۇمىسىن وسى تراكتور اتقارىپ تۇر قازىرگى زاماندا. دەگەنمەن, ەلدەگى اۋىلشارۋاشىلىق تەحنوپاركىن جاڭارتۋ جۇمىستارى باياۋ جۇرۋدە. ايتالىق, قازاقستاندا قازىر 150 مىڭعا جۋىق تراكتور, 38 مىڭ كومباين, 5 مىڭ تۇقىم سەبۋ كەشەنى, 200 مىڭنان استام توپىراق وڭدەۋ ماشينالارى بار. شارۋالار ىلدەبايلاپ قولدانىپ جۇرگەن وسى تەحنيكانىڭ 76%-ءى ەسكىرگەن. ال ماشينا پاركىن جاڭارتۋعا تۇسكەن وتىنىشتەردىڭ بارلىعىن قاناعاتتاندىرۋ مۇمكىن بولماي تۇر. باقىت ءىلياسوۆ, قر اشم تەحنيكالىق جاراقتاندىرۋ باسقارماسىنىڭ باسشىسى: – ءوتىنىش كوپ. ونى اشىعىن ايتايىق, قاراجات جەتپەي جاتىر. اىل شارۋاشىلىعى فەرمەرلەرىنىڭ مالىمەتى بويىنشا قاراجاتتىڭ جەتىسپەۋلىگىنەن 4 مىڭ ءوتىنىش قاراۋسىز قالدى. بيىل مينيسترلىكپەن ءبىراز شارالار جاسالىنىپ جاتىر.

100 ملرد تەڭگەگە ۇلتتىق ەكونوميكا مينيسترلىگىمەن كەلىسىم بار. رەسپۋبليكالىق بيۋدجەتتى انىقتاۋ كەزەڭىندە اقشا بولىنەدى دەپ كۇتىلۋدەمىز. «باعدارلاماعا قاتىسقان شارۋالاردان تراكتورعا سۇرانىس جوعارى, اسىرەسە, وتاندىق تەحنيكاعا تاپسىرىس كوپ», – دەيدى ماماندار. قازاقستاندىق وندىرۋشىلەر ءوز تاراپىنان سۇرانىستى قاۋقارىنشا وتەۋگە تىرىسۋدا. ماسەلەن, 2022 جىلى ەلدە 3911 تراكتور شىعارىلسا, بىلتىر بۇل سان 30%-كە ارتىپ, وتاندىق كومپانيالار 5111 تراكتور جاساعان. تەحنيكالاردىڭ بارلىعى شارۋالارعا ەڭ قولايلى شارتتارمەن بەرىلەدى.

باقىت ءىلياسوۆ, قر اشم تەحنيكالىق جاراقتاندىرۋ باسقارماسىنىڭ باسشىسى: – بىلتىر اۋىل شارۋاشىلىعى مينيسترلىگىمەن 20 ملرد تەڭگەگە جەڭىلدەتىلگەن ليزينگ باعدارلاماسى «قازاگروقارجى» ارقىلى جۇزەگە اسىرىلدى. 3500 تەحنيكا 1500 شارۋاعا جەڭىلدىكپەن بەرىلدى. ول جەردەگى نەگىزگى شارتتارى 6%, ون جىلعا, العاشقى جارناسىز. ول وتە قولايلى شارتتار ءبىزدىڭ شارۋالارعا. جەڭىلدىكپەن تەحنيكا العىسى كەلەتىن شارۋالار ءۇشىن «قازاقستاندا جاسالعان», «جاسىل ءونىم», «ءوز ازىعى», «جەڭىلدىكتى ليزينگ» دەپ اتالاتىن ليزينگتىك باعدارلامالار بار.

اۋىل شارۋاشىلىعى مينيسترلىگى اتالمىش قارجىلىق جوبالار ارقىلى جىل سايىن ماشينا پاركىنىڭ 8-10%-ءىن جاڭارتۋدى جوسپارلاپ وتىر.