ەلىمىزدە بەنزين تاپشىلىعىن بولدىرماۋ ءۇشىن ەكسپورت شەكتەلمەك

فوتو: ەنەرگەتيكا مينيسترلىگى

قازاقستان كەيبىر مۇناي ونىمدەرىن ەۋرازيالىق ەكونوميكالىق وداق اۋماعىنان تىس جەرگە تاسىمالداۋدى شەكتەمەك, دەپ حابارلايدى Qandastar.kz.

ەنەرگەتيكا مينيسترلىگىنىڭ حابارلاۋىنشا, بۇگىنگى تاڭدا اي-92 جانار-جاعار مايى مەن ديزەل وتىنىنا سۇرانىس ارتىپ كەلەدى. قارجى مونيتورينگى اگەنتتىگىنىڭ اقپاراتى بويىنشا «جابىن تاۋارلارى» تۇرىندەگى جانار-جاعار ماي «سۇر» ەكسپورتىنىڭ جانە اعىندارىنىڭ اي سايىنعى كولەمى 10 مىڭ تونناعا جەتەدى. بۇل باعا شەكارالاس ەلدەرگە قاراعاندا 17 – 107% -عا تومەن بولىپ وتىر. سول سەبەپتى بەنزين مەن ديزەل وتىنىن جاسىرىن جولمەن تاسىمالداۋ دەرەكتەرى كوبەيگەن. وسىلايشا, «جابىن تاۋارلارى» دەگەن اتپەن مۇناي ونىمدەرىن اكەتۋگە باقىلاۋدى كۇشەيتۋ تالاپ ەتىلمەك.

«قازاقستان رەسپۋبليكاسى ەنەرگەتيكا ءمينيسترىنىڭ 2023 جىلعى 24 ناۋرىزداعى № 118 بۇيرىعىنا وزگەرىس ەنگىزۋ تۋرالى» قازاقستان رەسپۋبليكاسى ەنەرگەتيكا, ساۋدا جانە ينتەگراتسيا, قارجى جانە ۇلتتىق ەكونوميكا مينيسترلىكتەرىنىڭ ەۋرازيالىق ەكونوميكالىق وداقتىڭ كەدەندىك اۋماعىنان تىس جەرلەرگە قازاقستان رەسپۋبليكاسىنان ەكسپورتقا تىيىم سالىنعان نەمەسە شەكتەلگەن مۇناي ونىمدەرىنىڭ تىزبەسىن بەكىتۋ تۋرالى» بىرلەسكەن بۇيرىعىنىڭ جوباسى (بۇدان ءارى — بۇيرىق جوباسى) دايىندالدى.

بۇيرىقتىڭ جوباسى بۇيرىققا قوسىمشاعا سايكەس قازاقستان رەسپۋبليكاسىنىڭ اۋماعىنان ەۋرازيالىق ەكونوميكالىق وداقتىڭ كەدەندىك اۋماعىنان تىس مۇناي ونىمدەرىنىڭ جەكەلەگەن تۇرلەرىن اكەتۋگە تىيىم سالۋدى 2024 جىلعى 31 جەلتوقساننان 2026 جىلعى 31 جەلتوقسانعا دەيىن ۇزارتۋدى كوزدەيدى.

مۇناي ونىمدەرىن ەاەو-دان تىس جەرلەرگە اكەتۋگە تىيىم سالۋ مىناداي مۇمكىندىك بەرەدى:

قازاقستاندىق ءموز-ءدىڭ جۇمىس ىستەمەيتىن قۋاتتارىن جۇكتەۋ جانە تيىسىنشە ەلدەگى اۆتوبەنزين تاپشىلىعىن ازايتۋ;

باجسىز جەتكىزۋ شارتتارىن ورىنداۋ جانە ەاەو مۇناي جانە مۇناي ونىمدەرىنىڭ ورتاق نارىقتارى قۇرىلعانعا دەيىن يمپورتتىق مۇناي ونىمدەرىنىڭ كەرى ەكسپورتىن الىپ تاستاۋ.

مۇناي ونىمدەرى ەكسپورتىنا تىيىم سالۋ مەرزىمىن تاعى ەكى جىل ۇزارتۋعا قاتىستى قۇجات 23 قازان كۇنى «اشىق نقا» سايتىندا جاريالاندى.