ەلىمىزدە بىلتىردان بەرى 4 ميلليوننان استام اعاش وتىرعىزىلدى

فوتو: اشىق دەرەككوز

«قورشاعان ورتاعا جاناشىر بولۋ, وعان ۇلكەن جاۋاپكەرشىلىكپەن جانە شىنايى قامقورلىقپەن قاراۋ ۇلتتىق يدەولوگيانىڭ وزەگى بولۋى كەرەك. 

بىلتىردان بەرى «تازا قازاقستان» جالپىۇلتتىق جوباسى جۇزەگە اسىرىلىپ جاتىر, بۇل بارشاڭىزعا ايان. وسى جۇمىسقا ميلليونداعان ازاماتىمىز اتسالىسۋدا. جۇرت بولىپ جۇمىلۋدىڭ ارقاسىندا 860 مىڭ گەكتاردان استام اۋماق تازالاندى, 4 ميلليوننان استام اعاش وتىرعىزىلدى. وسىنداي بەلسەندى جۇمىستى جالعاستىرا بەرسەك, اڭساعان ارمانىمىزعا جەتىپ, قازاقستان ناعىز جاسىل ەل بولماق. ال بۇل كەلەشەك ۇرپاققا كەرەمەت ۇلگى-ونەگە جانە وسيەت بولىپ قالارى انىق.

مۇنى ەل ىشىندە جاپپاي قولداۋ تاپقان جاسامپاز قۇندىلىقتاردىڭ جارقىن كورىنىسى, حالقىمىزدىڭ يگى ىستەرگە دەگەن ۇمتىلىسى دەپ تۇسىنگەن ءجون. وسى جۇمىسقا اتسالىسىپ جۇرگەن ازاماتتارعا, اسىرەسە, جاستارعا ريزاشىلىعىمدى بىلدىرەمىن.

تازالىق مادەنيەتىن قوعامدا تەرەڭ ورنىقتىرۋ – وتە ماڭىزدى مىندەت. وسى باعىتتا ۇكىمەت ەكولوگيالىق اعارتۋ ءىسىنىڭ بىرىڭعاي ۇلگىسىن ەنگىزۋگە ءتيىس. بۇل جۇمىس مەكتەپتەن باستاپ جوعارى وقۋ ورىندارىنا دەيىن بارلىق دەڭگەيدەگى ءبىلىم مەكەمەلەرىن قامتۋى قاجەت», – دەدى قاسىم-جومارت توقاەۆ.