Elimizde dekretke shyǵatyn er adamdar kóbeıgen

Foto: ashyq derekkóz

Byltyr elimizde 277 myń adam bala kútimine baılanysty áleýmettik tólem alsa, sonyń 500-ge jýyǵy — er adam, dep habarlaıdy qandastar.kz

«Memlekettik áleýmettik saqtandyrý qory» AQ málimetinshe, dekrettik demalysta otyrǵan erlerdiń úlesi Pavlodar men Soltústik Qazaqstan oblysynda joǵary.

Máselen Pavlodarda áleýmettik tólem 2023 jyly 7 865 adamǵa taǵaıyndalǵan. Sonyń 40-y — er adam. О́tken jyly 7825 áıel ómirge náreste ákelse, bala kútimimen 33 áke úıde otyrǵan.

SQO-da bala týý kórsetkishi eki jyldan beri birqalypty, shamamen 4,5 myń náreste dúnıege kelgen.

Alaıda 2023 jyly 10 er adam, byltyr 18 er adam dekrettik demalysqa shyqqan. Úlesi — 0,5%.

Budan keıin 0,3% kórsetkishpen Almaty, Astana qalalary jáne Jambyl oblysy keledi.

Qyzylorda men Batys Qazaqstan oblystarynda bala kútimimen úıde otyratyn erlerdiń sany óte az.

Qyzylordada byltyr shamamen 14,7 myń áıel bosanǵan, eki jaǵdaıda ǵana bala kútimine baılanysty er adamdar úıde otyrǵan.

Bala týý kórsetkishi boıynsha alda turǵan Túrkistan oblysynda byltyr 37 myń sábı dúnıege kelip, 29 er adam dekrettik demalysqa shyqty.

Jalpy byltyr qor bala kútimine baılanysty kirisinen aıyrylǵandarǵa 404,1 mlrd teńge áleýmettik tólem jasaǵan.

Mamandardyń aıtýynsha, qazir bala týǵannan keıin balanyń ata-anasynyń bireýi birjolǵy áleýmettik memlekettik járdemaqy ala alady. Birinshi-úshinshi balaǵa — 38 AEK, tórtinshi baladan keıin 63 AEK mólsherinde tólem jasalady.

Jumys isteıtin anasyna nemese ákesine 1,5 jasqa deıin bala kútimine qordan áleýmettik tólem júrgiziledi.

Birinshi balaǵa — 5,76 AEK, ekinshi balaǵa — 6,81 AEK, úshinshi balaǵa — 7,85 AEK, tórtinshi baladan bastap 8,9 AEK mólsherinde tólenedi.