ەلىمىزدە قاۋىپتىڭ «سارى» دەڭگەيى الىپ تاستالدى

استانا, الماتى, قاراعاندى جانە كوكشەتاۋ قالالارىندا تەرروريزمگە قارسى وپەراتسيانىڭ رەجيمى اياقتالدى, دەپ حابارلايدى qandastar.kz.

تەرروريزمگە قارسى كۇرەس جونىندەگى رەسپۋبليكالىق جەدەل شتابتىڭ مالىمەتىنشە, بۇل شىۇ-عا مۇشە مەملەكەتتەر باسشىلارىنىڭ ءسامميتى مەن قىتاي حالىق رەسپۋبليكاسى توراعاسىنىڭ مەملەكەتتىك ساپارىنىڭ اياقتالۋىنا بايلانىستى قابىلدانعان شەشىم.

«قازاقستان رەسپۋبليكاسى مەملەكەتتىك كۇزەت قىزمەتىنىڭ باستىعى, كۇزەتىلەتىن ادامداردىڭ قاۋىپسىزدىگىن قامتاماسىز ەتۋ جونىندەگى كۇزەت ءىس-شارالارىن جۇرگىزۋ كەزىندە تەرروريزمگە قارسى كۇرەس جونىندەگى رەسپۋبليكالىق جەدەل شتابتىڭ باسشىسى رەتىندە «تەرروريزمگە قارسى ءىس-قيمىل تۋرالى» زاڭنىڭ 13 جانە 15-باپتارى نەگىزىندە استانا قالاسىندا 4 شىلدەدە 23 ساعات 59 مينۋتتان باستاپ تەرروريزمگە قارسى وپەراتسيانىڭ قۇقىقتىق رەجيمىن جويۋ تۋرالى شەشىم قابىلدادى», – دەلىنگەن حابارلامادا.

قر پرەزيدەنتىنىڭ 2013 جىلعى 9 تامىزداعى № 611 جارلىعىمەن بەكىتىلگەن «تەرروريزم اكتىسى قاتەرىنىڭ تۋىنداۋى تۋرالى حالىقتى حاباردار ەتۋ جانە اقپارات مونيتورينگىنىڭ مەملەكەتتىك جۇيەسىن ۇيىمداستىرۋ جانە جۇمىس ىستەۋ قاعيدالارىنا» سايكەس, استانا, الماتى, قاراعاندى جانە كوكشەتاۋ قالالارىندا 4 شىلدەدە 23 ساعات 59 مينۋتتان باستاپ تەرروريستىك قاۋىپىڭ قالىپتى («سارى») دەڭگەيى الىپ تاستالادى, دەپ حابارلادى ورتالىق.

قاۋىپسىزدىك كۇشتەرى بولىمشەلەرى قالىپتى جۇمىس رەجيمىنە ورالىپ جاتىر.