ەلىمىزدە مەملەكەتتىك ساتىپ الۋدى وتكىزۋ مەرزىمى قىسقارتىلدى

قازاقستاندا 2025 جىلعى 1 قاڭتاردان باستاپ كۇشىنە ەنگەن جاڭا جەڭىلدەتىلگەن ەرەجەلەر بويىنشا مەملەكەتتىك ساتىپ الۋ تۋرالى العاشقى شارتتار جاسالدى. ولاردى قابىلداۋ جوبالاردى, سونىڭ ىشىندە الەۋمەتتىك ماڭىزى بار جوبالاردى جەدەل ىسكە قوسۋعا جانە ولاردىڭ قىمباتتاۋىنداعى تاۋەكەلدەردى ازايتۋعا مۇمكىندىك بەرەدى. جەڭىمپازدار نەگىزىنەن جەرگىلىكتى كومپانيالار بولادى, بۇل ايماقتاردىڭ بيزنەسى مەن ەكونوميكاسىنا قولداۋ كورسەتۋ بولىپ سانالادى,  دەپ حابارلايدى qandastar.kz

مەملەكەت باسشىسى 2024 جىلعى 1 شىلدەدە راسىمدەردى وڭايلاتۋعا جانە بيۋروكراتيادان ارىلتۋعا باعىتتالعان «مەملەكەتتىك ساتىپ الۋ تۋرالى» جاڭا زاڭعا قول قويدى. زاڭ شەڭبەرىندە مەملەكەتتىك ساتىپ الۋدى وتكىزۋ مەرزىمدەرىن بارىنشا قىسقارتۋدى قامتيتىن جاڭا ەرەجەلەر قابىلداندى.

ماسەلەن, كونكۋرس تاسىلىمەن وتكىزىلەتىن ساتىپ الۋ بويىنشا ءتيىستى قۇجاتتامانى تالقىلاۋ 5 كۇننەن 2 جۇمىس كۇنىنە دەيىن, وتىنىمدەردى قابىلداۋ — 15 كۇننەن 5 جۇمىس كۇنىنە دەيىن, وتىنىمدەردى قاراۋ جانە قورىتىندىلاۋ — 10 كۇننەن 3 جۇمىس كۇنىنە دەيىن قىسقارتىلدى. وسىلايشا, كونكۋرستار مەن اۋكتسيوندار بويىنشا جەڭىمپاز ەڭ كوپ دەگەندە 10 جۇمىس كۇنى ىشىندە انىقتالادى.

رەيتينگتىك-بالدىق جۇيەنى قولدانا وتىرىپ وتكىزىلەتىن كونكۋرس (ساتىپ الۋدىڭ اۆتوماتتاندىرىلعان ءتاسىلىن, جەڭىمپازدى ۆەب-پورتال ايقىندايدى) ارقىلى ساتىپ الۋ جەڭىمپازدارى جينالعان بالدار نەگىزىندە 5 جۇمىس كۇنى ىشىندە (بۇرىن مەرزىمى 29 جۇمىس كۇنىن قۇراعان) ايقىندالادى. ولار جۇمىس تاجىريبەسى, تۇراقتى سالىق اۋدارىمدارىنىڭ بولۋى, كەشىكتىرۋلەردىڭ بولماۋى جانە باسقالارى ءۇشىن بەرىلەدى.

باعا ۇسىنىستارىن سۇراتۋ تاسىلىمەن ساتىپ الۋ مەرزىمى 5 كۇننەن 2 كۇنگە دەيىن قىسقارتىلدى. سونداي-اق جەرگىلىكتى جەتكىزۋشىلەر ءۇشىن شارتتى جەڭىلدىكتەر 1%-دان 2%-عا دەيىن ۇلعايتىلدى.

اقمولا وبلىسىنىڭ زەرەندى اۋىلىندا بالالار مەن جاسوسپىرىمدەر سپورت مەكتەبىنىڭ قۇرىلىسى بويىنشا بايقاۋ جاڭا ەرەجەلەر بويىنشا ەلىمىزدە العاشقىلاردىڭ ءبىرى بولىپ وتكىزىلدى. ول بيىلعى 8 قاڭتاردا جاريالاندى, ال ونىڭ قورىتىندىسى 6 جۇمىس كۇنى ىشىندە شىعارىلدى جانە 16 قاڭتاردا قۇرىلىس سالۋشى جۇمىسقا كىرىستى.

«جوبانىڭ قۇنى 2 ملرد تەڭگەدەن اسادى. مەردىگەر رەيتينگتىك-بالدىق جۇيەنى قولدانا وتىرىپ, جاڭا مەملەكەتتىك ساتىپ الۋلار بويىنشا تاڭدالدى, بۇل كونكۋرس مەرزىمىن ايتارلىقتاي قىسقارتتى. بۇل بىزگە قۇرىلىستى 16 قاڭتاردا باستاپ كەتۋگە مۇمكىندىك بەردى. جوبا جىل سوڭىنا دەيىن اياقتالادى جانە نىسان پايدالانۋعا بەرىلەدى. سونداي-اق ءبىز جۇيەدە قوسىمشا بالل الاتىن جەرگىلىكتى قۇرىلىس سالۋشىلارعا نازار اۋدارامىز, بۇل ولاردىڭ قاتىسۋىن ىنتالاندىرادى», — دەدى اقمولا وبلىسىنىڭ قۇرىلىس, ساۋلەت جانە قالا قۇرىلىسى باسقارماسى باسشىسىنىڭ مىندەتىن اتقارۋشى ازامات بايقۋانىشەۆ.

سپورت مەكتەبىنىڭ عيماراتى وتپە جول ارقىلى ءبىر-بىرىمەن بايلانىسقان ەكى بلوكتان تۇرادى. مۇندا ترەناجەر زالى, حوككەي كورتى جانە باسقا دا جاتتىعۋ الاڭدارى جۇمىس ىستەيتىن بولادى. قۇرىلىس ماتەريالدارىنىڭ 90%-ىن جەرگىلىكتى وندىرىستەن الۋ جوسپارلانۋدا. اۋىلدىق سپورت مەكتەبىنىڭ جالپى قابىلداۋ مۇمكىندىگى – اۋىسىمدا 78 ادام.