جاڭالىقتار
ەلىمىزدە وكپە راگىنىڭ الدىن الۋ ءۇشىن تومەن دوزالى كومپيۋتەرلىك توموگرافيا قولدانىلا باستادى.
ەلىمىزدە وكپە راگىنىڭ الدىن الۋ ءۇشىن تومەن دوزالى كومپيۋتەرلىك توموگرافيا قولدانىلا باستادى. دارىگەرلەردىڭ ايتۋىنشا, بۇل رەنتگەنمەن سالىستىرعاندا قاۋىپسىز. بۇل تۋرالى وسكەمەنگە بارعان ەلىمىزدىڭ باس ونكولوگى ديليارا قايداروۆا مالىمدەدى. ونىڭ ايتۋىنشا, جاپپاي جۇرگىزىلگەن سكرينينگتىڭ ناتيجەسى كوڭىل كونشىتپەيدى. سوندىقتان مامانداردىڭ بىلىكتىلىگىن ارتتىرۋ ماڭىزدى. شالعاي اۋىل تۇرعىندارىنىڭ سكرينينگ ناتيجەسىن وبلىستىق ونكولوگيالىق ورتالىق دارىگەرلەرى ءجىتى زەرتتەيتىن بولادى. سالالىق ماماندار اۋىلداعى ناۋقاسپەن تىكەلەي تىلدەسەدى. بۇدان بولەك وبلىستاعى بىلىكتى دارىگەرلەر توقسان سايىن اۋىل-ايماقتى ارالاپ شىعادى. وسىلايشا ونداعى ارىپتەستەرمەن تاجىريبە بولىسەدى. بىلتىر ەلىمىزدە 39 مىڭ ادامنان قاتەرلى ىسىك انىقتالدى. ديليارا قايداروۆا, قازاق ونكولوگيا جانە راديولوگيا عىلىمي — زەرتتەۋ ينستيتۋتىنىڭ ديرەكتورى: — فەلدشەرلەر تاجىريبەدەن ءوتىپ ءجۇر, بىراق ولار ءار ءۇش اي سايىن اۋىسىپ كەتەدى. ورنىنا ارينە تاعى دا جاس مامان كەلەدى. ونىڭ سول جەردەگى مەديتسينالىق تەحنيكادان حابارى جوق بولۋى نەمەسە جەتىك بىلمەۋى مۇمكىن. سوندىقتان ءبىزدىڭ ونكولوگتار وسى ولقىلىقتىڭ ورنىن تولتىرۋ كەرەك.
