ەلىمىزدە وقۋعا تۇسە الماعان تۇلەكتەرگە تاعى دا 10 مىڭ گرانت بولىنەدى

فوتو: اشىق دەرەككوز

قازاقستاندا ۇبت-دا 100-دەن جوعارى بالل جيناسا دا, گرانتقا تۇسە الماعاندارعا قوسىمشا 10 مىڭ گرانت بولىنەدى. بۇل تۋرالى qandastar.kz  Stan.kz اقپارات اگەنتتىگىنە سىلتەمە جاساپ حابارلايدى.

بيىل بيۋدجەتتىك ورىندارعا بىلتىرعىمەن سالىستىرعاندا باق سىناعاندار سانى 11 مىڭ ۇمىتكەرگە كوپ بولعان. سونداي-اق گرانت توڭىرەگىندە داۋ تۋىپ, ۇبت-دان جوعارى بالل العاندار سۋ تاسقىنىنان زارداپ شەككەن ايماقتىڭ تۇلەكتەرىنە گرانت بەرىلگەنىنە قارسى شىقتى.

“توتەنشە جاعداي ايماعىنا جالپى گرانتتان بولەك گرانت ءبولىنۋى كەرەك ەدى. بۇل – ءار بالانىڭ نەسىبەسى. كەلەسى جىلى دا ۇمىتكەرلەر كوپ بولادى. سوندىقتان جۋرناليستيكا, مەنەدجمەنت, اعىلشىن ءتىلى, دۇنيەجۇزى تاريحى سياقتى ماماندىقتارعا گرانتتار كوبىرەك بولىنسە ەكەن دەيمىن”, – دەدى تالاپكەر نازەركە قالجىگىت.

كوكتەمدە تابيعي اپات بولعان ايماقتاردىڭ تۇلەكتەرىنە مەملەكەتتەن بارلىعى 5 مىڭنان استام ءبىلىم گرانتى ءبولىندى. ءماجىلىس دەپۋتاتى يسلام سۇڭقاردىڭ ايتۋىنشا, ءتيىستى ۆەدومستۆو ىقتيمال سالدارى مەن تاۋەكەلدەردى بولجاي الماعان.

“جاعداي ەكىۇشتى. ءبىر جاعىنان توتەنشە جاعدايداعى ايماقتاردان كەلگەن بالالارعا كومەكتەستىك, ەكىنشى جاعىنان باسقا بالالاردىڭ قۇقىعىن تاپتادىق. ەندى ولار سوتقا بەرمەك. بۇل – ولاردىڭ قۇقىعى. مۇنداي سوتتار ۇزاققا سوزىلادى. مۇنىڭ ناتيجەسى قانداي بولاتىنى دا انىق ەمەس. ءتىپتى ولار سوتتا جەڭىسكە جەتىپ, مينيسترلىك ولارعا بۇل گرانتتار ءۇشىن وتەماقى تولەۋى كەرەك بولسا دا, ولار كەلەسى جىلدىڭ بيۋدجەتىنەن تۇسەتىن شىعار. وعان ءتيىستى ءبولىم كىنالى. ونى نەعۇرلىم انىق جانە اشىق ۇيىمداستىرۋ قاجەت ەدى”, – دەدى ءماجىلىس دەپۋتاتى يسلام سۇڭقار.

عىلىم جانە جوعارى ءبىلىم ءمينيسترى ساياسات نۇربەك گرانتتاردىڭ باسىم بولىگىن مەملەكەت ءۇشىن ماڭىزدى ماماندىقتاردى تاڭداعان تالاپكەرلەر يەلەنەتىنىن ايتتى.

“بيىلدان باستاپ بىزدە جىلۋ ەنەرگەتيكاسى, سۋ, ورمان شارۋاشىلىعى سالالارىنداعى ۇلكەن پروبلەمالارعا بايلانىستى جىلۋ ەنەرگەتيكاسى, گيدروگەولوگيا, ۆەتەريناريا, اۋىل شارۋاشىلىعى سياقتى ماماندىقتارعا قوسىمشا گرانتتار ءبولىنىپ جاتىر. جوعارى بالل جيناعان ستۋدەنتتەردىڭ تولىق ءتىزىمىن رەكتورلارىمىزعا تاپسىردىق. بۇل – مىقتى جانە تالانتتى ستۋدەنتتەر. قوسىمشا 10 مىڭعا جۋىق گرانت بولىنەدى”, – دەدى عىلىم جانە جوعارى ءبىلىم ءمينيسترى ساياسات نۇربەك.

مينيسترلىك ارنايى بايلانىس ورتالىعىن ىسكە قوستى. وندا قوسىمشا ءبىلىم گرانتتارى تۋرالى بارلىق قاجەت اقپاراتتى الا الاسىز. 10 مىڭ گرانتتىڭ 3 مىڭىن ەلىمىزدىڭ جەتەكشى جوعارى وقۋ ورىندارى, 2 مىڭعا جۋىعىن جۇمىس بەرۋشىلەر مەن «قازاقستان حالقى» قورى, قالعانىن وبلىس اكىمدىكتەرى بولەدى.

ەسكە سالساق, جەلىدە تۇلەكتەر جوو-عا ءتۇسۋ گرانتىنىڭ باسىم بولىگى سۋ تاسقىنىنان زارداپ شەككەندەرگە بەرىلگەنىنە قارسى شىققان ەدى. ولار پەتيتسيا جاريالاپ, مينيسترلىكتى سوتقا بەردى.