Elimizde oqýǵa túse almaǵan túlekterge taǵy da 10 myń grant bólinedi

Foto: ashyq derekkóz

Qazaqstanda UBT-da 100-den joǵary ball jınasa da, grantqa túse almaǵandarǵa qosymsha 10 myń grant bólinedi. Bul týraly qandastar.kz  Stan.kz aqparat agenttigine silteme jasap habarlaıdy.

Bıyl bıýdjettik oryndarǵa byltyrǵymen salystyrǵanda baq synaǵandar sany 11 myń úmitkerge kóp bolǵan. Sondaı-aq grant tóńireginde daý týyp, UBT-dan joǵary ball alǵandar sý tasqynynan zardap shekken aımaqtyń túlekterine grant berilgenine qarsy shyqty.

“Tótenshe jaǵdaı aımaǵyna jalpy granttan bólek grant bólinýi kerek edi. Bul – ár balanyń nesibesi. Kelesi jyly da úmitkerler kóp bolady. Sondyqtan jýrnalıstıka, menedjment, aǵylshyn tili, dúnıejúzi tarıhy sııaqty mamandyqtarǵa granttar kóbirek bólinse eken deımin”, – dedi talapker Nazerke Qaljigit.

Kóktemde tabıǵı apat bolǵan aımaqtardyń túlekterine memleketten barlyǵy 5 myńnan astam bilim granty bólindi. Májilis depýtaty Islam Suńqardyń aıtýynsha, tıisti vedomstvo yqtımal saldary men táýekelderdi boljaı almaǵan.

“Jaǵdaı ekiushty. Bir jaǵynan tótenshe jaǵdaıdaǵy aımaqtardan kelgen balalarǵa kómektestik, ekinshi jaǵynan basqa balalardyń quqyǵyn taptadyq. Endi olar sotqa bermek. Bul – olardyń quqyǵy. Mundaı sottar uzaqqa sozylady. Munyń nátıjesi qandaı bolatyny da anyq emes. Tipti olar sotta jeńiske jetip, mınıstrlik olarǵa bul granttar úshin ótemaqy tóleýi kerek bolsa da, olar kelesi jyldyń bıýdjetinen túsetin shyǵar. Oǵan tıisti bólim kináli. Ony neǵurlym anyq jáne ashyq uıymdastyrý qajet edi”, – dedi májilis depýtaty Islam Suńqar.

Ǵylym jáne joǵary bilim mınıstri Saıasat Nurbek granttardyń basym bóligin memleket úshin mańyzdy mamandyqtardy tańdaǵan talapkerler ıelenetinin aıtty.

“Bıyldan bastap bizde jylý energetıkasy, sý, orman sharýashylyǵy salalaryndaǵy úlken problemalarǵa baılanysty jylý energetıkasy, gıdrogeologııa, veterınarııa, aýyl sharýashylyǵy sııaqty mamandyqtarǵa qosymsha granttar bólinip jatyr. Joǵary ball jınaǵan stýdentterdiń tolyq tizimin rektorlarymyzǵa tapsyrdyq. Bul – myqty jáne talantty stýdentter. Qosymsha 10 myńǵa jýyq grant bólinedi”, – dedi Ǵylym jáne joǵary bilim mınıstri Saıasat Nurbek.

Mınıstrlik arnaıy baılanys ortalyǵyn iske qosty. Onda qosymsha bilim granttary týraly barlyq qajet aqparatty ala alasyz. 10 myń granttyń 3 myńyn elimizdiń jetekshi joǵary oqý oryndary, 2 myńǵa jýyǵyn jumys berýshiler men «Qazaqstan halqy» qory, qalǵanyn oblys ákimdikteri bóledi.

Eske salsaq, jelide túlekter JOO-ǵa túsý grantynyń basym bóligi sý tasqynynan zardap shekkenderge berilgenine qarsy shyqqan edi. Olar petıııa jarııalap, mınıstrlikti sotqa berdi.