ەلىمىزدە پەدوفيلدەرگە كاستراتسيا جاسالادى

فوتو:schuchin.gov.

قازاقستاندا پەدوفيلدەرگە قاتىستى حيميالىق كاستراتسيانى مىندەتتى تۇردە قولدانۋعا باعىتتالعان جاڭا وزگەرىس دايىندالۋدا, دەپ حابارلايدى qandastar.kz

دەنساۋلىق ساقتاۋ ءمينيسترىنىڭ «مەديتسينالىق ماجبۇرلەۋ شارالارىن قولدانۋ قاعيدالارىن بەكىتۋ تۋرالى» بۇيرىعىنا وزگەرىس ەنگىزۋ جوباسىندا:

«جازا مەرزىمى اياقتالۋعا التى اي قالعاندا حيميالىق كاستراتسيا قولدانۋ قاراستىرىلىپ وتىر. سونىمەن قاتار, مەكەمە اكىمشىلىگى سوتقا سوت-پسيحياتريالىق ساراپتاما تاعايىنداۋ ءۇشىن ماتەريالداردى جازاسىن وتەۋ مەرزىمى اياقتالعانعا دەيىن 12 ايدان كەشىكتىرمەي جولداۋى ءتيىس. ساراپتاما ادامنىڭ پسيحيكالىق اۋىتقۋى مەن جىنىستىق زورلىققا بەيىمدىلىگىن انىقتاۋ ءۇشىن جۇرگىزىلەدى», – دەلىنگەن.

ايتا كەتەيىك, قازاقستاندا حيميالىق كاستراتسيا 18 جاستان اسقان جانە كامەلەتكە تولماعاندارعا قارسى جىنىستىق قىلمىس جاساعان ادامدارعا قاتىستى قولدانىلادى. بۇل – تەك سوت شەشىمىمەن جانە مىندەتتى سوت-پسيحياتريالىق ساراپتاما ناتيجەسى نەگىزىندە جۇزەگە اساتىن ءماجبۇرلى مەديتسينالىق شارا. ساراپتاما سوتتالۋشىنىڭ پسيحيكالىق ەسى دۇرىس ەكەنىن جانە «پەدوفيليا» دياگنوزى بارىن راستاۋى قاجەت.

كاستراتسيا انتياندروگەندى پرەپاراتتاردى ۇنەمى ەگۋ ارقىلى جۇرگىزىلەدى جانە ادامنىڭ جىنىستىق قۇمارلىعىن باسۋعا باعىتتالعان. ەگەر دەنساۋلىق جاعدايىنا بايلانىستى مۇنداي شارانى قولدانۋعا بولمايتىن بولسا, سوتتالعان ادامعا پسيحوتەراپيالىق ەم جانە پسيحياتر دارىگەردىڭ تۇراقتى باقىلاۋى تاعايىندالادى.