جاڭالىقتار
ەلىمىزدە پويىز بيلەتتەرى قىمباتتايدى
فوتو: اشىق دەرەككوز
قر كولىك مينيسترلىگى تەمىرجول جانە سۋ كولىگى كوميتەتى توراعاسىنىڭ ورىنباسارى نۇرجان كەلبۋعانوۆ 19 اقپاندا ورتالىق كوممۋنيكاتسيالار قىزمەتىنە وتكەن بريفينگ بارىسىندا پويىز بيلەتتەرىنىڭ قىمباتتايتىنىن مالىمدەدى, دەپ حابارلايدى qandastar.kz
ونىڭ ايتۋىنشا, قازاقستان بويىنشا بۇگىندەرى 2 672 جولاۋشىلار پويىزى قاتىنايدى.
«ەگەر ەكى جىل بۇرىن ءبىز 118 ۆاگون ساتىپ الساق, وتكەن جىلى 143 ۆاگون ساتىپ العانبىز, ال بيىل 226 ۆاگون جەتكىزىلدى, ولار ەڭ سۇرانىسقا يە باعىتتاردا قاتىنايتىن بولادى», دەپ تولىقتىردى ءوز ءسوزىن ول.
ونىڭ ايتۋىنشا, بيىل قاراعاندى مەن استانا, سونداي-اق ەرەيمەنتاۋ-استانا اراسىندا ەكى ەلەكتر پويىزىن جولعا شىعارۋ جوسپارلانۋدا.
«1 ناۋرىزدان باستاپ ينفلياتسياعا قاتىستى يندەكساتسيا جاسالىپ, پويىز بيلەتتەرى قىمباتتايدى. بۇل جىل سايىنعى شارا. بىلتىر ينفلياتسيا 20%-دان اسىپ تۇسكەن كەزدىڭ وزىندە بىزدە بيلەتتەر 7%-عا عانا قىمباتتادى. بيىل دا باعا وسى كولەمدە عانا وسەدى», – دەدى كوميتەت وكىلى.
