ءبىلىمجاڭالىقتار
ەلىمىزدە سيرەك مەتالدى قايتا وڭدەۋ عىلىمي-زەرتتەۋ ورتالىعى ىسكە قوسىلادى
فوتو: ۆيدەودان سكرين
Satbayev University مەن وڭتۇستىك كورەيانىڭ KITECH كومپانياسى سيرەك جەر مەتالدارىن قايتا وڭدەۋ بويىنشا عىلىمي-زەرتتەۋ ورتالىعىن ىسكە قوسۋدا, دەپ حابارلادى qandastar.kz عىلىم جانە جوعارى ءبىلىم مينيسترلىگىنە سىلتەمە جاساپ.
قازاقستاندىق عالىمدار مەن كورەيانىڭ ونەركاسىپتىك تەحنولوگيالار ينستيتۋتى (KITECH) بىرلەسىپ, سيرەك جانە وتە سيرەك كەزدەسەتىن جەر مەتالدارىن تەرەڭدەتە قايتا وڭدەۋ تەحنولوگيالارىن ازىرلەۋگە كەلىستى. بۇل ورتالىقتى قۇرۋ تۋرالى مەموراندۋمعا وسى جىلدىڭ قىركۇيەك ايىندا قول قويىلعان بولاتىن. ال بۇگىن الماتىدا ساتباەۆ ۋنيۆەرسيتەتى مەتاللۋرگيا جانە بايىتۋ ينستيتۋتىنىڭ عالىمدارى مەن KITECH باسشىلارى كەزدەسىپ, وسى جوبانى جۇزەگە اسىرۋدىڭ جوسپارىن كەزەڭ-كەزەڭىمەن قۇردى.
كورەيا دەلەگاتسياسىن KORAM جانە KITECH ديرەكتورى پاك كيون تحە مىرزا باسقاردى. كەزدەسۋگە قر عىلىم جانە جوعارى ءبىلىم ۆيتسە-ءمينيسترى دارحان احمەت-زاكي, ساتباەۆ ۋنيۆەرسيتەتىنىڭ رەكتورى مەيرام بەگەنتاەۆ قاتىستى.
