جاڭالىقتار
ەلىمىزدە تەرروريزمدى ناسيحاتتاعان 34 ادام سوتتالدى
فوتو: اشىق دەرەككوز
بيىل جىل باسىنان بەرى ۇقك تەرگەگەن قىلمىستىق ىستەر بويىنشا تەرروريستىك جانە ەكسترەميستىك قىلمىستار جاساعانى ءۇشىن ءارتۇرلى مەرزىمگە 34 ادام, سونداي-اق 2 شەتەل ازاماتى سوتتالعان, – دەپ حابارلايدى qandastar.kz
ۇقك مالىمەتىنشە, ولار تەرروريزمدى ناسيحاتتاعانى, ءدىني ارازدىق تۋدىرعانى, تەرروريستىك جانە ەكسترەميستىك توپتاردىڭ ارەكەتىنە تارتقانى, قۇرعانى جانە ولارعا قاتىسقانى, تىيىم سالىنعان ۇيىمداردىڭ ارەكەتىنە قاتىسقانى ءۇشىن كىنالى دەپ تانىلعان.
سونداي ازاماتتاردىڭ ءبىرى اقتوبە قالالىق سوتىنىڭ شەشىمىمەن تەرروريزمدى ناسيحاتتاعانى جانە اتىس قارۋىن زاڭسىز ساقتاعانى ءۇشىن كىنالى دەپ تانىلىپ, 9 جىلعا باس بوستاندىعىنان ايىرىلدى.
ۇقك تەرگەگەن قىلمىستىق ءىس شەڭبەرىندە, ونىڭ اينالاسىنداعىلاردى لاڭكەستەردى جاقتاپ, شەتەلدەگى سوعىس قيمىلدارىنا قاتىسۋعا شاقىرعانى, سونىمەن قاتار ءوزى دە ولارعا قوسىلۋدى جوسپارلاعانى انىقتالدى.
ءتىنتۋ بارىسىندا ودان 2 اۆتومات, 8 تاپانشا, 8 مىلتىق, 3 شولاق قارۋ, جاسىرىن تاسىمالداناتىن گارنيتۋراسىمەن 6 راديوستانسا, 3 ءتۇتىن شاشكاسى, 1 جارىق گراناتاسى جانە 581 پاترونى تابىلدى.
سونداي-اق ۇقك ماتەريالى بويىنشا, الماتى وبلىستىق سوتىنىڭ شەشىمىمەن قاسكەلەڭ قالاسىنىڭ ءبىر تۇرعىنى تەرروريزمدى ناسيحاتتاعانى جانە تەرروريستىك ارەكەتتەردى ۇيىمداستىرۋعا ادامداردى تارتقانى ءۇشىن 9 جىلعا باس بوستاندىعىنان ايىرىلدى.
– فيگۋرانت قازاقستاندا رەزونانستى زورلىق-زومبىلىق اكتسياسىن جاساۋ ءۇشىن لاڭكەستىك توپ قۇرۋدى جوسپارلاعان. وسى ماقساتتا باسقا ءدىندار ادامدارعا لاڭكەستىك يدەولوگيانى قابىلداتىپ, ولاردى ءوز قاتارىنا تارتۋعا ارەكەتتەنگەن, – دەپ ناقتىلادى ۇقك وكىلدەرى.
