Elimizde terrorızmdi nasıhattaǵan 34 adam sottaldy

Foto: ashyq derekkóz

Bıyl jyl basynan beri UQK tergegen qylmystyq ister boıynsha terrorıstik jáne ekstremıstik qylmystar jasaǵany úshin ártúrli merzimge 34 adam, sondaı-aq 2 shetel azamaty sottalǵan, – dep habarlaıdy  qandastar.kz

UQK málimetinshe, olar terrorızmdi nasıhattaǵany, dinı arazdyq týdyrǵany, terrorıstik jáne ekstremıstik toptardyń áreketine tartqany, qurǵany jáne olarǵa qatysqany, tyıym salynǵan uıymdardyń áreketine qatysqany úshin kináli dep tanylǵan.

Sondaı azamattardyń biri Aqtóbe qalalyq sotynyń sheshimimen terrorızmdi nasıhattaǵany jáne atys qarýyn zańsyz saqtaǵany úshin kináli dep tanylyp, 9 jylǵa bas bostandyǵynan aıyryldy.

UQK tergegen qylmystyq is sheńberinde, onyń aınalasyndaǵylardy lańkesterdi jaqtap, sheteldegi soǵys qımyldaryna qatysýǵa shaqyrǵany, sonymen qatar ózi de olarǵa qosylýdy josparlaǵany anyqtaldy.

Tintý barysynda odan 2 avtomat, 8 tapansha, 8 myltyq, 3 sholaq qarý, jasyryn tasymaldanatyn garnıtýrasymen 6 radıostansa, 3 tútin shashkasy, 1 jaryq granatasy jáne 581 patrony tabyldy.

Sondaı-aq UQK materıaly boıynsha, Almaty oblystyq sotynyń sheshimimen Qaskeleń qalasynyń bir turǵyny terrorızmdi nasıhattaǵany jáne terrorıstik áreketterdi uıymdastyrýǵa adamdardy tartqany úshin 9 jylǵa bas bostandyǵynan aıyryldy.

– Fıgýrant Qazaqstanda rezonansty zorlyq-zombylyq akııasyn jasaý úshin lańkestik top qurýdy josparlaǵan. Osy maqsatta basqa dindar adamdarǵa lańkestik ıdeologııany qabyldatyp, olardy óz qataryna tartýǵa árekettengen, – dep naqtylady UQK ókilderi.