ەلىمىزدە تۇرمىستىق زورلىق-زومبىلىق ءۇش ەسە وسكەن

فوتو: stan.kz

بيىلعى جىلدىڭ سەگىز ايىندا تۇرمىستىق زورلىق-زومبىلىق دەڭگەيى ءۇش ەسە وسكەن, – دەپ حابارلايدى qandastar.kz

ستاتيستيكا بويىنشا ەلىمىزدە 1,6 مىڭ قىلمىستىق قۇقىق بۇزۋشىلىق ورىن السا, ونىڭ 628-ءى ۇرىپ-سوعۋ فاكتىلەرى. جوعارى كورسەتكىش وتباسىلىق زورلىق-زومبىلىققا قاتىستى جازانى كۇشەيتۋمەن بايلانىستى بولۋى مۇمكىن.

ەسكە سالايىق, بيىل «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويىلدى. ونىڭ باستى ماقساتى –  زورلىق-زومبىلىقتىڭ كەز كەلگەن ارەكەتى ءۇشىن جاۋاپكەرشىلىكتى كۇشەيتۋ, وتباسى ينستيتۋتىن نىعايتۋ جانە كامەلەتكە تولماعانداردىڭ قاۋىپسىزدىگىن قامتاماسىز ەتۋ.

اتاپ ايتقاندا, قازىر دەنساۋلىققا قاساقانا ورتاشا جانە اۋىر زيان كەلتىرگەنى ءۇشىن تەك 8 جىلعا دەيىن باس بوستاندىعىنان ايىرۋ قاراستىرىلعان. ال بۇرىن ايىپتالۋشىنىڭ بوستاندىعى تىپتەن شەكتەلمەۋى مۇمكىن ەدى.

دەنساۋلىققا جەڭىل زيان كەلتىرۋ تۋرالى باپ تا قاتاڭداتىلدى. قىلمىسكەرگە 200 اەك-كە دەيىن ايىپپۇل سالۋ نەمەسە 50 تاۋلىككە دەيىن قاماۋعا الۋ كوزدەلەدى. سونىمەن قاتار قازىر بۇل قىلمىس ءۇشىن اكىمشىلىك ەمەس, قىلمىستىق جاۋاپكەرشىلىك قاراستىرىلعان. وسى قىلمىس اۋىرلاتاتىن ءمان-جايلار بولعان كەزدە 1000 اەك-كە دەيىن ايىپپۇل سالۋدى نە 2 جىلعا دەيىن باس بوستاندىعىنان ايىرۋدى نەمەسە شەكتەۋدى كوزدەيدى.