ءبىلىم
ەلىمىزدە ۇلتتىق قۇزىرەتتىلىك ورتالىعى اشىلادى
فوتو: اشىق دەرەككوز
ۇلتتىق قۇزىرەتتىلىك ورتالىعى بيزنەس پەن ءبىلىم بەرۋ ۇيىمدارى اراسىندا ديالوگ الاڭىنىڭ ءرولىن اتقارادى, سونداي-اق ستۋدەنتتەردى حالىقارالىق كاسىبي شەبەرلىك جارىستارىنا دايارلاۋ, ساراپشىلىق قاۋىمداستىقتى دامىتۋ, جۇمىسشى ماماندىقتاردىڭ تانىمالدىلىعىن ارتتىرۋ جونىندەگى بىرىڭعاي جاتتىعۋ بازاسىنا اينالادى, دەپ جازادى qandastar.kz
«مەملەكەت باسشىسىنىڭ كەلەسى جىلدى جۇمىسشى ماماندىقتار جىلى دەپ جاريالاۋى ەلىمىز ءۇشىن تەحنيكالىق جانە كاسىپتىك ءبىلىم بەرۋدىڭ قانشالىقتى ماڭىزدى ەكەنىن كورسەتەدى. ونىڭ ىشىندە ۇلتتىق قۇزىرەتتىلىك ورتالىعىنىڭ اشىلۋى جۇمىسشى ماماندىقتارىنىڭ تارتىمدىلىعى مەن ءبىلىم ساپاسىن ارتتىرۋ جونىندەگى ستراتەگيانى جۇزەگە اسىرۋداعى نەگىزگى قادام. ورتالىق ۇلتتىق قۇرامانىڭ الەمدىك WorldSkills چەمپيوناتتارىنا دايىندالاتىن بازاسىنا اينالادى, سونداي-اق كادرلاردى قايتا دايارلاۋ مەن ولاردىڭ بىلىكتىلىگىن ارتتىرۋدا باستى ايماقتىق بازا بولادى. سونداي-اق ول جۇمىس بەرۋشىلەر مەن كادرلاردى دايارلاۋ جۇيەسىنىڭ اراسىنداعى ىنتىماقتاستىقتى ارتتىرادى», – دەپ اتاپ ءوتتى وقۋ-اعارتۋ ءمينيسترى عاني بەيسەمباەۆ WorldSkills Kazakhstan – 2024 چەمپيوناتىنىڭ جابىلۋ سالتاناتىندا سويلەگەن سوزىندە.
اتاپ ءوتۋ كەرەك, مۇنداي ورتالىقتار قىتاي, وڭتۇستىك كورەيا, رەسەي ەلدەرىندە تابىستى جۇزەگە اسىرىلىپ, جوعارى بىلىكتى كادرلار دايارلاۋدا ءوزىنىڭ تيىمدىلىگىن دالەلدەدى. الەمدە WorldSkills قوزعالىسى – جۇمىسشى ماماندىقتارىنىڭ بەدەلىن ارتتىرۋدىڭ باستى قۇرالى بولىپ تابىلادى. حالىقارالىق ارەنادا قازاقستاننىڭ ۇلتتىق قۇراماسى ەلىمىزدىڭ نامىسىن 2014 جىلدان بەرى قورعاپ كەلەدى.
