جاڭالىقتار
ەلىمىزدە « ۇلى دالا تاريحىنىڭ جازبا مۇرالارى» كورمەسى ءوتتى
قولجازبالار جانە سيرەك كىتاپتار ۇلتتىق ورتالىعى 2024 جىلعى ارحەوگرافيالىق ەكسپەديتسيالار ناتيجەلەرى بويىنشا ەسەپ بەرىپ, ەلىمىزدىڭ تاريحىنا قاتىستى كونە دەرەكتەر كورسەتىلگەن « ۇلى دالا تاريحىنىڭ جازبا مۇرالارى» اتتى كورمەسىن ۇيىمداستىردى
قر مادەنيەت جانە اقپارات مينيسترلىگىنىڭ ءباسپاسوز قىزمەتى مالىمەتىنشە, مەملەكەت باسشىسى قاسىم-جومارت توقاەۆ ۇلتتىق قۇرىلتايدىڭ ءۇشىنشى وتىرىسىندا ەلىمىزدىڭ تاريحىن زەرتتەۋ مەن ناسيحاتتاۋعا, ءتىل ماسەلەسىنە, ونوماستيكا, تاريحي مۇرالار مەن تاريحي تۇلعالارعا, تابيعي جانە تاريحي مەكەندەرگە, ەرەكشە نازار اۋداردى. سونىمەن قاتار پرەزيدەنت تاريحي-مادەني جادىگەرلەردى, ولاردىڭ كوشىرمەلەرىن قازاقستانعا قايتارۋ جۇمىستارىن جانداندىرۋ دا اسا ماڭىزدى ەكەنىن اتاپ ءوتتى.
كورمەدە ۇلىبريتانيادان اكەلىنگەن 15 قولجازبا مەن ارحيۆتىك قۇجاتتىڭ كوشىرمەلەرى جانە رەسپۋبليكا اۋماعىندا انىقتالعان 150-دەن اسا كونە قولجازبا مەن سيرەك قۇندى كىتاپتار كورمەگە قويىلدى. ولاردىڭ ىشىندە تۇركى-يسلام مادەنيەتىنىڭ قۇندى ەسكەرتكىشى, العاش تۇركى تىلىنە اۋدارىلعان قاسيەتتى قۇران كىتابى (X-XII عع.), ءابۋ ناسىر ءال-فارابي, قوجا احمەت ياسساۋي, سۇلەيمەن باقىرعاني ەڭبەكتەرىنىڭ كوشىرمەلەرى, XI عاسىرداعى پارسى تاريحشىسى گارديزيدىڭ «زەين-ءال-احبار» قولجازباسى, ت.ب. بار.
