Jańalyqtar
Elimizde uryp-soǵý áreketi úshin arnaıy bap engiziledi jáne jaza qatańdaıdy
Elimizde balalar men áıelderdiń quqyǵyn qorǵaýǵa baǵyttalǵan zań jobasynda uryp-soǵý áreketi úshin jeke bap kózdeledi. Bul týraly Ishki ister mınıstrliginiń resmı ókili Shyńǵys Alekeshev málim etti.
Resmı ókildiń aıtýynsha, adamdy uryp soqqany úshin kinálige 80 AEK kóleminde aıyppul salynady, sondaı-aq 80 saǵatqa deıin qoǵamdyq jumysqa tartylady nemese 25 kúnge deıin qamaýǵa alynady.
Eger 2 nemese odan da kóp adamdy uryp-soqsa, dármensiz kúıdegi adamdy, materıaldyq jáne ózge de táýeldi bolsa nemese balalardy uryp-soqqan jaǵdaıda aıyptyǵa 30-dan 50 táýlikke deıin qamaýǵa alýdyń eń joǵary sankııasy kózdeledi.
«Adam densaýlyǵyna qasaqana jeńil zııan keltirgeni úshin 200 AEK-ke deıin aıyppul, ne bolmasa 200 saǵatqa deıin qoǵamdyq jumys isteý nemese 50 táýlikke deıin qamaýǵa alý kózdeledi. Eger zardap shekken adamnyń sany ekeýden kóp bolsa, dármensiz adam bolsa, kinálige materıaldyq nemese ózge de táýeldilikte nemese kámeletke tolmaǵan jasóspirim bolsa, onda aıyptyǵa 1 myń AEK-ke deıin aıyppul nemese 600 saǵatqa deıin qoǵamdyq jumysqa tartý, ne bolmasa 2 jylǵa deıin shekteý nemese bas bostandyǵynan aıyrý jazasy kózdeledi», — dedi Sh. Alekeshev vedomstvoda ótken brıfıngide.
