ەلىمىزدە زەينەت جاسى تومەندەي مە? مينيستر جاۋاپ بەردى

ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا زەينەت جاسىنىڭ تومەندەۋىن تالاپ ەتكەن پەتيتسياعا قاتىستى پىكىر ءبىلدىردى, – دەپ جازادى Aikyn.kz.

ول پەتيتسيا قاجەتتى داۋىستى جيناسا, حالىقتىڭ پىكىرىن تىڭداپ, ماسەلەنى قارايتىن جۇمىس توبىنىڭ قۇرىلاتىنىن ايتتى.

«ستراتەگيالىق ەسەپتەردى جۇرگىزىپ قويدىق. سوندىقتان قازىرگى ۋاقىتتا شەشىم قابىلدانسا, پەتيتسيا كەرەك داۋىستى جيناسا, حالىقتىڭ الدىنا شىعىپ, پىكىرلەسىپ, جۇمىس توبىن قۇرىپ شەشىم قابىلدانادى. قازىر ءبىز باسقا شارالاردى قاراپ وتىرمىز. نەگىزى زەينەت جاسىنا تيىسپەي-اق, زەينەتكە ەرتە شىعۋ قۇقىعى, زەينەتكە ءتيىستى جاسىنان كەش شىعۋ قۇقىعى دەگەن ءىس-شارالاردى قاراستىرىپ وتىرمىز», – دەپ جاۋاپ بەردى مينيستر ءماجىلىس كۋلۋارىندا.

ايتا كەتەيىك, قازىر epetition پورتالىندا ايەلدەردىڭ زەينەت جاسىن 55 جاسقا دەيىن, ال ەرلەردىكىن 58 جاسقا دەيىن تومەندەتۋدى تالاپ ەتكەن پەتيتسياعا قازاقستاندىقتار قول قويىپ جاتىر.